Hér að neðan finnur þú samantekt af spurningum um nám við Menntaskólann á Ásbrú, námið, kostnað og aðstöðuna. Smelltu á þá spurningu sem þú vilt fá svar við.
Í hvaða nám get ég farið eftir útskrift?
Námið veitir breiðan grunn til náms á háskólastigi bæði innan- og utanlands. Nemendur geta valið að bæta við sig raungreinum á síðasta námsári hafi þeir hug á framhaldsnámi í tölvunarfræði- eða forritun. Námið reynist einnig góður grunnur að framhaldsnámi í skapandi greinum.
Eru mörg tölvuleikjafyrirtæki á Íslandi?
Samkvæmt skýrslu sem unnin var fyrir IGI (samtök tölvuleikjaframleiðenda) voru 20 tölvuleikjafyrirtæki starfandi á Íslandi árið 2022 með 449 starfsmenn. Fjárfestingar í þessum fyrirtækjum voru upp á 48 milljónir króna árið 2021.
- 11 fyrirtæki framleiða leiki fyrir einkatölvur (e. PC)
- 11 fyrirtæki framleiða farsímaleiki (e. mobile games)
- 3 fyrirtæki framleiða sýndarveruleikaleiki (e. VR/AR games)
- 3 fyrirtæki framleiða leiki fyrir leikjatölvur (e. console games)
- 1 fyrirtæki framleiðir leiki fyrir netvafra (e. browser games)
Hvaða fyrirtækjum hafið þið unnið með?
Nemendur MÁ hafa unnið samstarfsverkefni með tölvuleikjaframleiðendunum Arctic Theory, Parity Games, Solid Clouds og CCP. Þá hafa nemendur hannað tölvuleiki fyrir yngstu farþegana um Keflavíkuflugvöll í samstarfsverkefni með Isavia og fyrir HS veitur. Nemendur vinna eitt samstarfsverkefni á önn við aðila á vinnumarkaði bæði til þess að efla tengsl þeirra við atvinnulífið og veita nemendum raunhæfa reynslu af störfum í hugverkaiðnaði.
Hver eru inntökuskilyrðin?
Inntökuskilyrði eru hæfnieinkunn B í ensku, íslensku og stærðfræði í lok grunnskóla eða að hafa lokið fyrsta þreps áfanga í þessum greinum.
Hvernig skrái ég mig í nám?
Nemendur sækja um rafrænt á vef Menntamálastofnunar www.menntagatt.is á tilteknu auglýstu tímabili. Allir umsækjendur eru boðaðir í inntökuviðtal við fulltrúa Menntaskólans á Ásbrú. Til viðbótar við inntökuviðtalið er miðað við að umsækjandi hafi lokið grunnskólaprófi með hæfnieinkunn B í ensku, íslensku og stærðfræði eða hafi lokið fyrsta þreps áfanga í þessum greinum. Samkvæmt reglugerð nr. 1150/2008 um innritun í framhaldsskóla eiga umsækjendur undir 18 ára aldri rétt á að stunda nám í framhaldsskóla og hafa forgang fram yfir eldri umsækjendur. Hæfni umsækjenda er metin út frá fyrrnefndum viðmiðum og býðst skólavist með tilliti til hæfnimats. Inntökufjöldi getur verið ólíkur milli anna.
Hvað kostar námið?
Námsgjöld eru uppfærð árlega og upplýsingar um þau má finnar hér.
Námsgjöld eru innheimt fyrir hverja önn fyrir sig sérstaklega, þau miðast við staðgreiðslu og skulu vera að fullu greidd í upphafi hverrar annar samkvæmt útgefnum gjalddaga. Samhliða innheimtu námsgjalda eru innheimt félagsgjöld fyrir Örgjörvann nemendafélag Menntaskólans á Ásbrú. Nemandi getur ekki fengið afhent prófskírteini fyrr en uppgjör vegna námsgjalda hefur farið fram að fullu. Þeir nemendur með ógreidd skólagjöld þegar nám hefst geta átt von á að lokað verði á aðgang þeirra að kennslukerfi skólans án fyrirvara. Námsgjöld eru ekki endurgreidd.
Hvernig kemst ég til ykkar?
Það eru örar og reglulegar samgöngur með strætó til og frá Ásbrú, en leið 55 keyrir milli höfuðborgarsvæðisins og Reykjanesbæjar.
Nemendur í Menntaskólanum á Ásbrú geta keypt kort í Strætó sem gildir til og frá höfuðborgarsvæðisins. Nemendur sem uppfylla ákveðin skilyrði geta átt rétt á jöfnunarstyrk til að niðurgreiða ferðir til og frá skóla.
Hverjir eru kennararnir?
Forstöðumaður Menntaskólans á Ásbrú er Ingigerður Sæmundsdóttir, en auk hennar er einvalalið starfsfólks við skólann.
Hvernig tölvubúnað þarf ég?
Nemendur þurfa að hafa fartölvu til umráða í náminu. Lágmarks hugbúnaðarkröfur fyrir fartölvur eru æskilegar:
- Intel i5-11300H 4.5GHz Turbo 4-Kjarna eða sambærilegt
- 16GB DDR4 2933MHz vinnsluminni
- 512GB SSD hraðvirkur diskur
- GTX 1650 6GB GDDR6 leikjaskjákort
Einnig er nauðsynlegt að hver og einn hafi mús með þremur tökkum (eða tveimur tökkum og skrunhjóli). Vinsamlegast athugið að í fartölvur keyptar erlendis vantar oft < > | takka – en þeir eru mikið notaðir í forritun og því nauðsynlegir.
Vegna aðstæðna í samfélaginu ráðleggjum við nemendum einnig að hafa góð heyrnatól með míkrafón og góða vefmyndavél.
Hvað læri ég um tölvuleiki?
Tölvuleikjakjarninn samanstendur af sex áföngum í tölvuleikjagerð, markaðsfræði, frumkvöðlafræði, margmiðlun, heimspeki, eðlisfræði - og listgreinum í bundnu vali.
Hvernig fer kennslan fram?
Við notumst við nútíma kennsluhætti, vendinám, þverfaglega vinnu og verkefnamiðað vinnulag. Það eru engin lokapróf í MÁ heldur notað fjölbreytt námsmat sem er sinnt jafnt og þétt. Námið fer aðeins fram í staðnámi.
Hvernig er námsumhverfið?
Í MÁ er vinnuaðstaða í sérklassa sérstaklega hannað með það að leiðarljósi að vera nútímaleg, fjölbreytt og aðlaðandi starfsumhverfi þar sem nemendum líður vel og langar til þess að sinna vinnu sinni.
Hvernig virkar fjarnámshlaðborðið?
Á fjarnámshlaðborði Keilis getur hver sem er tekið valda framhaldsskólaáfanga við mjög sveigjanlegar aðstæður