Fara í efni

Eineltisáætlun

Ef þú telur að þú sért lagður í einelti, eða einhver sem þú þekkir, þá getur þú fengið aðstoð. Það er alltaf í lagi að hafa samband og biðja um hjálp, sama hvort þér finnst málið vera alvarlegt eða ekki.

Talaðu við þann sem þú treystir best. Fjölskylda, vinir eða samnemendur vita oft hvað er gott að gera og geta hjálpað manni að takast á við eineltið og/eða láta vita af því. Kennarar, námsráðgjafar og annað starfsfólk skólans getur aðstoðað þig - hikaðu aldrei við að hafa samband og ræða málið.

Einnig er hægt að tilkynna um einelti með því að smella hér.

Hjálparsími og netspjall Rauða krossins er opið allan sólarhringinn og þar er hægt að tala við fólk sem er þjálfað í að ræða við þá sem líður illa. Ekki þarf að gefa upp nafn og fullur trúnaður ríkir (nema tilkynningaskylda samkvæmt barnaverndarlögum gildi).

Fram kemur í siðareglum Keilis að nemendur og starfsfólk skuli koma fram hvert við annað af kurteisi og virðingu í öllum samskiptum. Einelti er ekki liðið við skólann. Ef upp kemur grunur um einelti innan skólans er tekið á þeim málum og þau sett í ákveðið ferli.

Markmið

  • Að til sé ákveðið ferli sem allir geta gengið að ef grunur leikur á einelti í skólanum.
  • Að stuðla að jákvæðum samskiptum milli nemenda og starfsfólks.

Skilgreining á einelti

Einelti er neikvætt og illgirnislegt atferli sem felur í sér endurtekið áreiti og/eða ofbeldi, líkamlegt eða andlegt. Eineltinu er stýrt af einstaklingi eða hópi, beinist að öðrum og stendur yfir í nokkurn tíma. Slík samskipti einkennast af ákveðnu ójafnvægi aflsmuna eða annars valds. Einelti getur birst á mismunandi hátt, m.a.:

  • sem stríðni,
  • sem hótanir,
  • sem útilokun,
  • í formi líkamlegs ofbeldis,

eða sem annað niðurlægjandi áreiti s.s.:

  • Niðurlæging eða auðmýking, t.d. vegna aldurs, kynferðis, kynhneigðar eða þjóðernis.
  • Niðurlægjandi eða lítilsvirðandi texti eða myndir í tölvupósti, sms eða öðrum samfélagsmiðli.
  • Fjandskap eða þögn þegar spurt er eða fitjað upp á samtali.
  • Óþægileg stríðni eða tilraun til fyndni á kostnað annarra.
  • Rógi eða meiðandi sögusögnum er komið af stað.
  • Útilokun frá félagslegum samskiptum.
  • Særandi athugasemdir.

Að þekkja einelti

Sá einstaklingur sem verður fyrir einelti eða ofbeldi segir oft ekki frá því heldur skammast sín og kennir sjálfum sér jafnvel um. Þess vegna er mjög áríðandi að allir þekki einkenni eineltis, en þau geta m.a verið þannig að einstaklingur:

  • Lýsir andúð á skólanum.
  • Hættir að sinna náminu, einkunnir lækka.
  • Missir sjálfstraustið.
  • Einangrast félagslega.
  • Virðist óhamingjusamur, niðurdreginn, þunglyndur eða í andlegu ójafnvægi.
  • Þjáist af svefntruflunum.
  • Hefur þreytutilfinningu eða sýnir sljóleika.
  • Neitar að segja frá hvað amar að.
  • Sýnir miklar skapsveiflur, verður árásargjarn og erfiður viðureignar.
  • Kvartar undan vanlíðan á morgnana.

Ef upp kemur einelti eða annað ofbeldi í skólanum ber að tilkynna það til námsráðgjafa eða annars starfsmanns skólans sem viðkomandi nemandi eða starfsmaður treystir sér til að tala við. Viðkomandi starfsmanni ber svo að tilkynna málið til siðanefndar skólans. Siðanefnd vinnur að lausn málsins með viðbragðsáætlun til hliðsjónar.

Viðbragðsáætlun

Aðgerðaráætlun vegna eineltis [PDF]

 

Ef skólanum tekst ekki að leysa vandann er hægt að biðja um aðstoð hjá fagráði eineltismála með því að senda skilaboð á þessari síðu hér eða á netfangið fagrad@mms.is

Telji nemendur sig ekki fá viðunandi lausn málsins í skólanum er hægt að vísa málinu til fagráðs eineltismála og/eða fá ráðgjöf í málinu á hvaða stigi sem er með því að senda skilaboð á þessari síðu hér eða á netfangið fagrad@mms.is

Hvert getum við leitað? - Gagnlegir tenglar

  • Einelti – útskýring

Greinargóð lýsing á einelti af síðunni gegneinelti.is: https://gegneinelti.is/born-og-ungmenni/einelti/ 

  • Hvert get ég leitað ef mér líður mjög illa

Þú getur alltaf leitað til námsráðgjafanna í skólanum eða annars starfsmanns innan skólans sem þú treystir þér til að tala við. Í Keili eru þrír námsráðgjafar og þú getur náð í þá hér

  • Í neyð
    Ef um neyðaratvik er að ræða þá er best að hringja beint í neyðarvaktina
    Sími: 112

  • Hjálparsími og netspjall Rauða Krossins
    Ekkert vandamál er of lítið eða stórt fyrir Hjálparsímann 1717 og netspjall Rauða krossins. Hjálparsíminn er alltaf opinn, trúnaði og nafnleynd er heitið og hann er ókeypis.
    Þar er hægt að tala við fólk sem er þjálfað í að ræða við þá sem líður illa. Ekki þarf að gefa upp nafn og fullur trúnaður ríkir (nema tilkynningaskylda samkvæmt barnaverndarlögum gildi).
    Sjá: https://www.raudikrossinn.is/verkefni/innanlandsverkefni/heilbrigdi-og-velferd/hjalparsiminn-1717-og-netspjallid/ 
    Sími: 1717
    Netspjall: 1717.is 

  • Bergið
    Bergið er stuðnings- og ráðgjafasetur fyrir ungt fólk upp að 25 ára aldri. Markmið Bergsins er að bjóða upp á lágþröskuldaþjónustu með áherslu á stuðning, fræðslu og ráðgjöf. Í Berginu er lagt upp með að skapa notalegt og öruggt umhverfi fyrir ungt fólk sem vill fá aðstoð fagfólks og notenda með fjölbreytta reynslu.
    Sjá: https://bergid.is/um-okkur/ 
    Sími: 5715580
    Netfang: bergid@bergid.is 

  • Píeta samtökin
    Píeta veitir fyrstu hjálp, aðgengilega þjónustu, stuðning og meðferð fyrir þá sem eru í sjálfsvígshættu og brú í úrræði fyrir aðra. Þjónustan er með öllu gjaldfrjáls og stendur til boða öllum þeim sem hafa náð átján ára aldri. Píeta samtökin vinna einnig að því að efla þekkingu og skilning á sálrænum sársauka og sjálfsvígum. Samtökin vilja vera leiðandi í forvarnarstarfi gegn sjálfsvígum á Íslandi.
    Sjá: https://pieta.is/thjonusta/ 
    Sími: 5522218
    Netfang: pieta@pieta.is 

  • Hvert geta foreldrar leitað ef þeir hafa áhyggjur ·

https://gegneinelti.is/hvert-get-eg-leitad/hvad-geta-foreldrar-gert/framhaldsskoli/

  • Ef ekki finnst lausn innan skólans

Fagráð eineltismála í grunn- og framhaldsskólum er úrræði á vegum mennta- og barnamálaráðuneytis til að aðstoða í eineltismálum í grunnskólum og framhaldsskólum. Ef skólanum tekst ekki að leysa vandann er hægt að biðja um aðstoð hjá fagráðinu. Þú getur haft samband og fengið ráðleggingar með því að senda skilaboð á þessari síðu hér eða á netfangið fagrad@mms.is og það verður hringt þig við fyrsta tækifæri.

Umboðsmaður barna vinnur að bættum hag barna. Eitt af hlutverkum embættisins er að leiðbeina um hvað lög og reglur í landinu segja um einelti.

Senda ábendingu um efni síðu