Fjórir skólar eru undir regnhlíf Keilis: Háskólabrú, Flugakademía Íslands, Heilsuakademían og Menntaskólinn á Ásbrú.
Að jafnaði eru árlega mill 600 - 700 nemendur skráðir í nám við skóla Keilis. Við Keili eru starfræktar námsbrautir og námskrið á framhaldsskólastigi.
Háskólabrú
Á Háskólabrú fer fram undirbúningsnám fyrir háskólanám. Nemendur skulu hafa lokið um 117 framhaldsskólaeiningum (70 eldri einingum) í framhaldsskóla en geta lokið að ári liðnu námi á Háskólabrú sem veitir inngöngu í háskóla. Námsskrá Háskólabrúar hefur verið sniðin að óskum deilda Háskóla Íslands. Nám á Háskólabrú er bæði hægt að taka í fjarnámi er hefst bæði á haust- og vorönn ár hvert og staðnám er hefst í ágúst ár hvert. Útskrifaðir nemendur stunda nú nám í háskólum hérlendis og erlendis.
Flugakademía Íslands
Flugakademía Íslands býður upp á fyrsta flokks einka- og atvinnuflugmannsnám í einum öflugasta flugskóla á Norðurlöndunum. Lögð er áhersla á nútímalega kennsluhætti og kennsluumhverfi en staðsetning skólans felur í sér einstakt tækifæri til þess að skapa frábæra aðstöðu til kennslu flugtengdra greina.
Heilsuakademían
Heilsuakademía Keilis leggur áherslu á að þróa og bjóða uppá nám á sviði heilsu- heilbrigðis- og íþróttafræða. Nú þegar er kennd við skólann ÍAK einkaþjálfun sem hefur vakið verðskuldaða athygli og nýtur mikilla vinsælda. Haustið 2013 hófst í fyrsta sinn ný námsbraut í styrktarþjálfun sem kennd verður með sama sniði og ÍAK einkaþjálfarinn. Ásamt okkar frábæru kennurum, koma nokkrir nýir kennarar að styrktarþjálfaranáminu, þar á meðal erlendir sérfræðingar, hver á sínu sviði. Þá heyrir Undirbúningsnámskeið fyrir inntökupróf Læknadeildar HÍ undir starfsemi Heilsuakademíunnar.
Menntaskólinn á Ásbrú
Við Menntaskólann á Ásbrú hefur verið boðið upp á tvær námsleið til stúdentsprófs; tölvuleikjagerð og opna braut.
Sú fyrri, námsbraut með áherslu á tölvuleikjagerð hefur verið starfrækt frá haustinu 2019. Námið byggir á hagnýtum verkefnum með sterkum tengslum við atvinnulífið þar sem lögð er áhersla á færni til framtíðar, nútíma kennsluhætti og vinnuaðstöðu í sérklassa. Markmiðið er að bjóða upp á nám í tölvuleikjagerð sem svarar bæði ákalli atvinnulífsins eftir vel menntuðu og sérhæfðu starfsfólki og áhuga ungs fólks á menntun til starfa í skapandi greinum.
Opinni braut til stúdentsprófs, sem er námsleið sem hefur göngu sína á þessu ári, er ætlað að veita nemendum undirbúning undir nám í ýmsum deildum háskóla. Nemandi setur sjálfur saman stúdentspróf sitt og hefur þannig tækifæri til að setja saman námsbraut sem samræmist hans áhugasviði eða áformum um áframhaldandi nám. Nemandinn tekur sömu kjarnafög og nemendur á öðrum brautum MÁ þar sem lögð er áhersla á færni til framtíðar, nútíma kennsluhætti og vinnuaðstöðu í sérklassa.
Aðrar námsleiðir
Fjarnámshlaðborð
Keilir býður einnig upp á Fjarnámshlaðborð þar sem hægt er að sækja hnitmiðaða áfanga á netinu sem miðast við Aðalnámskrá framhaldsskólanna og byggja á fyrirlestrum, æfingum og verkefnum. Áfangarnir eru einungis kenndir í fjarnámi og geta nemendur skráð sig hvenær sem þeim hentar. Hver nemandi hefur fjóra mánuði til að ljúka hverjum áfanga fyrir sig. Heildarfjöldi vinnustunda eru 18 - 24 klst á einingu og eru áfangarnir allir fimm einingar. Áfangarnir henta vel þeim sem vilja rifja upp námsefni eða þurfa að uppfylla ákveðnar forkröfur til náms.
Fótaaðgerðarfræði
Fótaaðgerðafræði er löggilt starfsgrein og teljast fótaaðgerðafræðingar til heilbrigðisstétta. Fótaaðgerðafræðingar meta ástand fóta og greina og meðhöndla þau fótamein sem ekki krefjast sérhæfðari læknisfræðilegrar meðferðar. Þeir framkvæma og meta eigin vinnu í samræmi við viðurkennda gæðastaðla og halda sjúkraskrár samkvæmt lögum þar um. Einnig veita þeir leiðbeiningar varðandi heilbrigði fóta og þau úrræði sem heilbrigðiskerfið býður uppá þar að lútandi.
Vinnuverndarskólinn
Heilsuakademía Keilis sér um rekstur Vinnuverndarskóla Íslands sem veitir sveigjanlega og skilvirka vinnuverndarfræðslu, miðaða að þörfum hvers fyrirtækis. Námið fer fram í formi opinna fjarnámskeiða þar sem menn geta stundað nám sitt óháð tíma og rúmi, og þannig aflað sér starfstengdra réttinda án þess að þurfa að vera frá vinnu. Þessari tegund fræðslu hefur verið tekið mjög vel af atvinnulífinu og sífellt fleiri sem nýta sér þetta fyrirkomulag - enda mikið hagræði bæði fyrir starfsmanninn og fyrirtækið.
Undirbúningur fyrir inntökupróf LHÍ
Heilsuakademía Keilis sér einnig um Undirbúningsnámskeið fyrir Inntökupróf Læknadeild Háskóla Íslands (læknisfræði og sjúkraþjálfunarfræði) var fyrst haldið á vordögum árið 2003. Kennsluefnið er uppfært árlega í samræmi við áherslur fyrri inntökuprófa. Að námskeiðinu kemur breiður og öflugur hópur kennara.