Fara í efni

Stúdentsbraut í tölvuleikjagerð

Tölvuleikir efla hugarfar sem leyfir sköpunargáfunni að vaxa

Stúdentsbraut í tölvuleikjagerð byggir á hagnýtum verkefnum með sterkri tengingu við atvinnulífið þar sem lögð er áhersla á færni til framtíðar, nútíma kennsluhætti og vinnuaðstöðu í sérklassa. Markmið okkar er að bjóða upp á nám í tölvuleikjagerð sem svarar bæði ákalli atvinnulífsins eftir vel menntuðu og sérhæfðu starfsfólki og áhuga ungs fólks á menntun til starfa í skapandi greinum.

Nám á stúdentsbraut í tölvuleikjagerð veitir breiðan grunn til framhaldsnáms á háskólastigi, með færni til framtíðar að leiðarljósi – nemendum gefst rúmur kostur á að leggja sínar eigin áherslur með valgreinum. Öflugir námsráðgjafar eru nemendum innan handar og leiðbeina þeim allan námsferilinn.

Samsetning náms

Stúdentsbrautin er hefðbundið 200 eininga nám á framhaldsskólastigi. Það skiptist í 80 einingar af almennum kjarna, 60 einingar af sérgreinum tölvuleikjagerðar og 60 einingum af valgreinum.

Hér má sjá samsetningu brautarinnar

Inntökuskilyrði

Nemendur sækja um rafrænt á vef Menntamálastofnunar á tilteknu auglýstu tímabili. Allir umsækjendur eru boðaðir í inntökuviðtal við fulltrúa Menntaskólans á Ásbrú. Til viðbótar við inntökuviðtalið er miðað við að umsækjandi hafi lokið grunnskólaprófi með hæfnieinkunn B í ensku, íslensku og stærðfræði - eða hafi lokið fyrsta þreps áfanga í þessum greinum. Samkvæmt reglugerð nr. 1150/2008 um innritun í framhaldsskóla eiga umsækjendur undir 18 ára aldri rétt á að stunda nám í framhaldsskóla og hafa þannig forgang fram yfir eldri umsækjendur. Hæfni umsækjenda er metin út frá fyrrnefndum viðmiðum og býðst skólavist m.t.t. hæfnimats. Inntökufjöldi getur verið ólíkur milli anna.

Innritun í framhaldsskóla fyrir vorönn 2022
  • Innritun á vorönn fer fram á tímabilinu 1.nóvember til 30.nóvember 2021

Innritun í framhaldsskóla er rafræn, þ.e. sótt er um skólavist á netinu. Nemendur þurfa nettengda tölvu og hægt er að fá aðstoð við innritun í grunnskólum og framhaldsskólum sé þess óskað.

Sækja um