Kynningarfundir fyrir Undirbúningsnámskeið fyrir Inntökupróf Læknadeildar HÍ verða haldnir miðvikudagana 7. september og 12. október kl. 17.30 í stofunni Bratta í húsnæði Háskóla Íslands við Stakkahlíð og í beinu streymi á www.inntokuprof.is. Á kynningarfundunum munu fyrsta árs læknanemar segja m.a. frá uppbyggingu námskeiðsins og sinni leið inn í námið. Námskeiðið hefur aðstoðað fjölmarga við að komast inn í læknisfræði og sjúkraþjálfunarfræði og sem dæmi þá sóttu yfir 90% núverandi 1. árs læknanema HÍ námskeiðið.
Uppbygging námskeiðsins
Námskeiðinu má skipta í fjóra hluta:
Kennsluvefur: Við skráningu fá þátttakendur aðgang að moodle kennslukerfinu sem inniheldur mikið magn af æfingaefni og upptökum af fyrirlestrum fyrri ára.
Handbók námskeiðsins: "Biblía" námskeiðsins er uppfærð árlega með gagnlegum upplýsingum fyrir Inntökupróf Læknadeildar HÍ.
Stoðtímar: Skipulögð dagskrá hefst í janúar með vikulegum stoðtímum í húsnæði HÍ við Stakkahlíð sem standa fram í apríl. Fyrri hluti stoðtímanna fer í fyrirlestur og seinni hlutinn í dæmatíma þar sem kennarar og aðstoðarfólk ganga um stofuna og aðstoða við úrlausn úthlutaðra verkefna. Athugið að fyrirlestrarnir eru í beinu streymi og því er námskeiðið aðgengilegt öllum, óháð staðsetningu. Einnig er mögulegt að varpa fram spurningum í gegnum fjarfundarbúnað.
Vorfyrirlestrar: Frá miðjum maí og fram að Inntökuprófi Læknadeildar HÍ í júní eru daglegir fyrirlestrar í húsnæði HÍ við Stakkahlíð.
Snemmskráningarafsláttur
Opið er fyrir skráningar á námskeiðið sem fyrst var haldið árið 2003 og er veittur snemmskráningarafsláttur. Ef skráningar berast fyrir 1. október er verðið 89.000 kr og 98.000 kr. frá og með 1. október.