Fara í efni

Námsframboð Háskólabrúar

Háskólabrú hefur undanfarin ár markað sér sérstöðu í að veita einstaklingsmiðaða þjónustu og stuðning við nemendur. Nám á Háskólabrú hefur gefið fjölda fólks nýtt tækifæri til náms og hafa flestir útskrifaðir nemendur hafið háskólanám að náminu loknu, við góðan orðstír. Hægt er að stunda nám á Háskólabrú í staðnámi, fjarnámi, með vinnu og með undirbúningi.

Saga Háskólabrúar

Fyrstu nemendur Háskólabrúar Keilis hófu nám haustið 2007 en skólinn starfar í samstarfi við Háskóla Íslands. Að uppfylltum inntökuskilyrðum tekur nám á Háskólabrú í staðnámi og í fullu fjarnámi tvær til þrjár annir en fjórar til sex annir í fjarnámi með vinnu, en lengd námsins fer eftir því hvaða deild er valin.

Haustið 2008 skrifaði Keilir og Háskóli Íslands undir samning þess eðlis að próf á Háskólabrú skuli samkvæmt samningnum almennt teljast sambærilegt stúdentsprófi og veitir inngöngu í þær deildir sem vísa í svið innan Háskóla Íslands. Þá hafa margir útskrifaðir nemendur einnig sótt nám í öðrum háskólum hérlendis og erlendis en eftir þeirra inntökuskilyrðum hverju sinni.

Markmiðið með Háskólabrú er að nemendur okkar séu vel undirbúnir til að takast á við krefjandi háskólanám. Hluti af gæðastarfi okkar felst í að fylgjast með gengi útskrifaðra nemenda okkar í háskóla. Frá upphafi höfum við gert kannanir meðal þeirra m.a hvernig nemendur telja sig vera undirbúna fyrir háskólanám. Flestir útskriftarnemenda okkar hefja háskólanám og um 80% þeirra telja sig vera vel undirbúna í háskóla sem rímar við niðurstöður könnunar Háskóla Íslands á gengi nýnema framhaldsskólanna þar sem að Háskólabrú Keilis er í fjórða sæti yfir þá nemendur sem telja sig vel undirbúna fyrir háskólanám. Þessar niðurstöður eru okkur mikilvægar en gæðastarfi er aldrei lokið heldur hvetur okkur áfram til þess að gera gott nám enn betra.

Fyrirkomulag náms

Háskólabrú býður upp á nám í fjórum deildum sem að vísa í svið Háskóla Íslands. Hægt er að stunda námið í fullu námi og tekur þá eitt ár eða hálfu námi og tekur þá að jafnaði tvö ár. Nám á háskólabrú er lotunám og skiptist hver önn í þrjár lotur bæði í staðnámi og fjarnámi. 

Deildir:

  • Félagsvísinda- og lagadeild, viðskipta- og hagfræðideild og hugvísindadeild skiptist í tvær annir í fullu námi en fjórar í hálfu námi.
  • Verk- og raunvísindadeild skiptist í þrjár annir í fullu námi (haust, sumar, vor) en í hálfu námi í sex annir.
Umsækjendum er bent á að hafa samband við námsráðgjafa óski þeir eftir aðstoð við val á námsleið. Sömu kennsluskrár gilda fyrir fjarnám og staðnám. Fjarnám hefst annars vegar í janúar og hins vegar í ágúst og hægt er að vera í fullu fjarnámi eða í fjarnámi með vinnu. Fullt fjarnám tekur eitt ár en fjarnám með vinnu tekur tvö ár. Staðnám hefst í ágúst ár hvert og tekur einn vetur.

Inntökuskilyrði

Miðað er við að nemendur séu orðnir 23 ára og hafi lokið 70 einingum (117 framhaldsskólaeiningum samkvæmt nýja einingakerfinu) á framhaldsskólastigi. Þar af þurfa umsækjendur að hafa lokið að minnsta kosti 6 einingum (10 feiningum) í hverju af grunnfögunum þremur, þ.e. í stærðfræði, íslensku og ensku. Umsækjendur eiga möguleika á að fá starfsreynslu sína metna til eininga að hluta upp í þær lágmarkseiningar sem krafist er.

Við bendum þeim sem vantar örfáar einingar upp á að mæta inntökuskilyrðum á Háskólabrú með undirbúningi, þá hvetjum við þá sem eru óvissir í vali sínu á námsleið til þess að hafa samband við námsráðgjafa.

Tölvu- og upplýsingamál

Fartölvur eru notaðar í námi á Háskólabrú. Nemendur fá nýjasta Office pakkann við komuna í skólann, vert er að benda á að í upplýsingatækni er kennt á Office umhverfið í PC tölvum og því eru þær tölvur hentugri til námsins. Þeir sem ætla sér að nota Apple tölvur þurfa að gera ráð fyrir því að verkefni geti verið tímafrekari í vinnslu en með PC.

Hafa samband við tölvuþjónustu

Sækja um nám á Háskólabrú Hafa samband Umsagnir