Fagháskólanám í leikskólafræði

Keilir og Háskóli Íslands bjóða upp á fagháskólanám í leikskólafræðum fyrir starfsfólk leikskóla á Suðurnesjum. Um er að ræða starfstengt og hagnýtt nám á háskólastigi. Umsóknarfrestur um nám á haustönn er til 22. júní.

Námið er sett upp sem 60 ECTS einingar og skilgreint sem nám með vinnu og er áætlað að það taki tvö ár. Stefnt er að því að námið hefjist 1. september næstkomandi og fara umsóknir fram á vef Háskóla Íslands.

Með fagháskólanáminu vilja samstarfsaðilar meðal annars stuðla að:

  • öflugu námi í leikskólafræðum á Suðurnesjum
  • eflingu menntunar innan leikskólanna á svæðinu
  • fleiri möguleikum starfsfólks leikskóla til starfsþróunar
  • því að sameina styrkleika formlegrar menntunar og þess óformlega náms sem fer fram á vettvangi leikskóla
  • samlegðaráhrifum sem verða til þegar Keilir, Háskóli Íslands, sveitarfélög og leikskólar á Suðurnesjum taka höndum saman. 

Fyrirkomulag og nánari útfærsla

Námið er sett upp sem 60 ECTS einingar og skilgreint sem nám með vinnu og er áætlað að það taki tvö ár. 

Diplómanám í leikskólafræði er hagnýtt, atvinnutengt nám á háskólastigi sem lýkur með veitingu sérstaks prófskírteinis, diplómu. Námið veitir haldgóða þekkingu á starfi með börnum í leikskólum og hentar einkum þeim sem hafa starfað sem leiðbeinendur í leikskólum og hyggjast bæta við hæfni sína og/eða hefja leikskólakennaranám. Nemendur munu fá námseiningar metnar sæki þeir um áframhaldandi nám í leikskólafræðum við Háskóla Íslands.

Námið verður fjarnám og verða staðlotur alla jafna haldnar hjá Keili. Kennslufræðileg nálgun mun byggja á virkri þátttöku nemenda, sköpun lærdómssamfélags, og sterkum tengslum fræða og fagvettvangs. Kennsluaðferðir verða fjölbreyttar og felast m.a. í vendinámi, einstaklings- og hópavinnu, vettvangsferðum og valdeflingu hvers nemanda.  

Markhópur

Námið er skipulagt sem brú yfir í háskólanám. Markhópur námsins eru leiðbeinendur sem starfa í leikskólum á Suðurnesjum. Stefnt er að því að fagháskólanám hefjist 1. september næstkomandi.

Umsókn og nánari upplýsingar

Umsókn um námið fer fram af heimasíðu Menntavísindasviðs Háskóla Íslands. Fólk velur umsóknargáttina, stofnar aðgang fyrst, passar að velja grunnnám - og námið sjálft heitir „Hagnýt leikskólafræði - grunndiplóma, 60e“Umsækjendur þurfa að sækja rafrænt um á þeirri síðu og hengja við tilheyrandi fylgigögn. Síðar verður kallað eftir staðfestum afritum af prófskírteinum/námsferilsyfirlitum frá þeim sem uppfylla inntökuskilyrðin.

Nánari upplýsingar má nálgast á faghaskoli@keilir.net