Fara í efni

Sjálfbær nýsköpun í ferðaþjónustu

Keilir tekur þátt í samstarfsverkefni við skóla og ferðaþjónustuaðila á Ítalíu og Tyrklandi undir heitinu RARE R.O.U.T.E.S. - Responsible Original Unpolluting Tourism Entrepreneurshipeða ábyrg og ómengandi nýsköpun í ferðaþjónustu upp á hið ylhýra.

Verkefnið miðar að því að styrkja samstarf milli skóla, sveitarfélaga, opinberra stofnana og fyrirtækja með það að markmiði að leiða saman færni og þekkingu nemenda í ferðaþjónustu við menningararf, umhverfismál og þá samfélagslegu arfleifð sem ferðaþjónustuaðilar styðjast við og nýta sér á ákveðnum svæðum.

Námsefni verður þróað og starfstengd námskeið sem nýtast ferðaþjónustuaðilum sem vilja byggja á sjálfbærri og ábyrgri ferðaþjónustu. Þá verður gögnum um góðar starfsvenjur í sjálfbærri ferðaþjónustu safnað og deilt milli samstarfsaðila. Leitast verður við að styrkja stöðu ungs fólks á vinnumarkaði með eflingu starfsnáms, þekkingar og færni þeirra sem leiðtogar og frumkvöðlar innan greinarinnar.

Verkefnið, sem hlaut hæstu einkunn allra Erasmus+ umsókna á Ítalíu, er til þriggja ára og hlaut samtals 416.000 Evra styrkveitingu. Samstarfsaðilar Keilis eru starfsmenntaskólar frá Ítalíu og Tyrklandi, ICEI – International Economic Cooperation Institute, ásamt ferðaþjónustuaðilum frá samstarfslöndunum. Auk þess taka Markaðsstofa Reykjaness, Samtök ábyrgrar ferðaþjónustu (AITR) og Start-Up Turismo á Ítalíu, ásamt Alþjóðlegu samtökunum um félagslega ferðaþjónustu (ISTO) þátt í verkefninu.

Vefur RARE R.O.U.T.E.S.