Háskólabrú og Háskólastoðir, undirbúningur til stúdentsprófs - Keilir

Menntastoðir er tilvalin námsleið fyrir þá sem vilja hefja nám á ný og ná sér í grunnfögin í framhaldsskóla. Námið er unnið í samstarfi við Miðstöð símenntunar á Suðurnesjum, Fræðslumiðstöð Atvinnulífsins og Keili, miðstöð vísinda, fræða og atvinnulífs. 

Markmið námsins er að stuðla að jákvæðu viðhorfi námsmanna til áframhaldandi náms og auðvelda þeim að takast á við ný verkefni. Í náminu er lögð áhersla á að nemendur læri að læra, efli sjálfstraust sitt og lífsleikni. Námið tekur um 6 mánuði (staðnám) eða 10 mánuði (dreifinám) og metur Keilir námið til 50 eininga. Munurinn á staðnámi og dreifinámi felst í því að staðnámið er dagskóli fimm daga vikunnar en dreifinámið er kvöld/helgarskóli með fjarnámssniði. 

Helstu námsgreinar eru: stærðfræði, íslenska, enska og námstækni. Nám í Menntastoðum kostar 110.000 kr. Hægt er að sækja um styrki hjá stéttarfélögum fyrir skólagjöldum. Jafnframt styrkir Vinnumálastofnun þá nemendur sem eru án atvinnu, eftir að gengið hefur verið frá námssamningi 

---

Boðið er upp á þrjár námsleiðir 

Menntastoðir fjarnám 

Fjarnám Menntastoða hefst í janúar 2012 er 10 mánaða langt nám sem byggir á einni helgarstaðlotu í mánuði. Kennt verður á föstudögum og laugardögum kl. 9:00 - 17:00. Í staðlotum er kennt í gegnum fjarfundarbúnað og verður kennslustundin aðgengileg á netinu til áhorfs ásamt öllu öðru kennsluefni. Þriðjudaga og fimmtudaga verður sett nýtt kennsluefni á netið sem nemendur vinna með heima. 

Menntastoðir staðnám 

Staðnám Menntastoða hefst í janúar 2012. Staðnámið er tæplega 6 mánaða langt nám og lýkur með útskrift í júní 2012. Kennt er alla virka daga kl. 8:30 - 15:10. 

Menntastoðir dreifinám 

Dreifinám Menntastoða er nám í 10 mánuði og verður kennt kl. 15:00 - 20:30 alla þriðjudaga og kl. 09:00 - 16:30 tvo laugardaga í mánuði. Námið er með fjarnámssniði, þ.e.a.s. heimaverkefni og tímaverkefni verða leyst í fjarnámi en nemendur mæta í skólann til að fá innlögn frá kennurum. Ath dreifnám verður aðeins kennt á vorönn ef næg þátttaka fæst. Skráðum nemendum verður þá boðið að flytja sig yfir í fjarnámshóp.

---

Nánari upplýsingar 

Öll kennsla í Menntastoðum byggist á tölvum þannig er það skilyrði að nemendur eigi fartölvu með Office 2007 hugbúnaði. Námssamning við Vinnumálastofnun þarf að gera áður en nemandinn hefur námið. Greiða þarf námið fyrirfram, eigi seinna en 2 vikum fyrir skólasetningu. Nánari upplýsingar um greiðslufyrirkomulag námsins fæst hjá Miðstöð símenntunar á Suðurnesjum eða í síma 421 7500. 

Kennt verður hjá SÍMEY á Akureyri MSS (Miðstöð símenntunar á Suðurnesjum) og MÍMI í Reykjavík.

Nemendur sem ljúka námi í Menntastoðum eiga kost á því að sækja um nám á Háskólabrú Keilis. Nám á Háskólabrú er lánshæft hjá LÍN, samkvæmt reglum LÍN.  Sjá nánar á heimasíðu Lánasjóðsins.

---

SÆKJA UM