Um Menntaskólann á Ásbrú

Keilir býður upp á nýja námsleið til stúdentsprófs með áherslu á tölvuleikjagerð. Námið hefur verið nokkur ár í burðarliðnum en um fjörtíu nemendur hófu nám við skólann á haustönn 2019. 

Velta tölvuleikjaiðnaðarins á heimsvísu er nú orðin meiri en kvikmyndaiðnaðarins. Á Íslandi eru tekjur af leikjaiðnaði nær eingöngu í formi útflutnings og hefur verið skortur á vel menntuðu innlendu starfsfólki við greinina. Markmið Keilis er að bjóða upp á nám í tölvuleikjagerð sem svarar bæði ákalli atvinnulífsins eftir vel menntuðu og sérhæfðu starfsfólki og áhuga ungs fólks á menntun til starfa í skapandi greinum. Áhersla verður lögð á náin tengsl við atvinnulífið en tölvuleikjaframleiðendur á Íslandi og Samtök leikja­framleiðenda á Íslandi (IGI) munu veita faglega ráðgjöf við gæðastjórnun og framkvæmd námsins.
 
Ný nálgun í kennslu og námsuhverfi
 
Þetta í fyrsta sinn sem Keilir býður upp á nám til stúdentsprófs frá því að skólinn var stofnaður árið 2007. Nám í tölvuleikjagerð á framhaldsskólastigi byggir á kjarna- og valfögum sem einskorðast ekki við forritun heldur taka á öllum fjölbreyttum þáttum sem til grundvallar eru fyrir skapandi starf leikjagerðarfólks, s.s.  hönnun, tónlist, hljóðupptökur, verkefnastjórnun og heimspeki o.fl. Þá er starfsnám og verkefna- og hópavinna mikilvægur hluti námsins.
 
Skólinn leggur áherslu á vendinám sem hefur verið stór hluti af starfi Keilis á undanförnum árum. Í náminu eru því hvorki hefðbundnar kennslustofur né hefðbundin stundatafla heldur sinna nemendur námi sínu og verkefnum í skólanum þar sem kennarar verða til staðar og leiðbeina þeim. Lögð er áhersla á nýstárlega nálgun í kennsluaðferðum og við námsmat. Til dæmis byrjar skólinn seinna á daginn en aðrir framhaldsskólar, nemendur nýta snjalltæki í stað skólabóka og stefnt er á afnám hefðbundinna prófa, þar sem stuðst verður í staðinn við meðal annars símat, nemendaverkefni og jafningjamat.