Annað skólaár Menntaskólans á Ásbrú var sett við athöfn í aðalbyggingu Keilis í dag, 17. ágúst 2020. Þar var tekið á móti 28 nýnemum sem bætast við nemendahóp skólans. Athöfnin var löguð að þeim raunveruleika sem COVID-19 heimsfaraldurinn hefur mótað okkur undanfarið ár. Því var ekki fært að bjóða foreldrum/forráðamönnum og öðru starfsfólki í ljósi tilskipana um að viðhalda eins meters bili og takmarka fjölda við 100 manns.
"Við búum við breyttan veruleika mér leiðist að bera þessi þungu skilaboð, en ég vil heldur eiga við ykkur heiðarlegt samtal en að láta eins og þessar vandasömu leikreglur sem við þurfum að fylgja hér í húsi ljúki á næstu vikum. Sannleikurinn er sá að við vitum ekki hvenær eða hvort við snúum aftur til nákvæmlega sama veruleika og við þekktum áður. Í fyrsta skipti á ævi flestra þeirra sem standa hér inni eru ráðamenn og yfirvöld í stöðugri óvissu og stöðugt að senda uppfærð fyrirmæli. Það getur verið óþægilegt fyrir samfélagsþegna. Við sem kunnum vel við rútínu og fyrirsjáanleika líður verr í svoleiðis aðstæðum.Það erokkar sjálfra að taka ábyrgð á því að setja á þennan veruleika jákvætt spin - og finna gleðina." sagði Nanna Kristjana Traustadóttir, skólameistari MÁ í setningarávarpi sínu. Þar sem hún lagði hún áherslu á bjartar horfur tölvuleikja- og hugverkaiðnaðar í núverandi árferði, hversu jákvætt það væri að geta yfir höfuð stundað námið úr sófanum í heimastofunni en ekki bara heima í stofunni og mikilvægi þess að hugsa út fyrir rammann og finna leiðir til þess að viðhalda og efla félagslíf innan hópsins úr viðeigandi fjarlægð.
Lauk hún ræðu sinni á orðunum "Skiljið úreltar gamaldags hugmyndir um kennslu og nám eftir við innganginn. Búist við því að ferli ykkar í gegnum námið í MÁ verði áskorun, styðjið hvert annað og gerið ykkar allra besta, alltaf.".
Ávarpið má finna í heild sinni hér