Vendinám auðveldar skólahald á tímum COVID-19

Þær gríðarlega miklu breytingar sem hafa verið á skólastarfi undanfarnar vikur hafa leitt til þess að menntastofnanir á flestum skólastigum eru farnar að líta á nýjar leiðir til að haga kennslu. 
 
Í hartnær áratug hefur Keilir stuðst við vendinám en þá er meðal annars stuðst við upptökur á fyrirlestrum kennara. Nemendur geta þannig horft á kennsluefnið eins oft og þeim sýn­ist og hvar sem þeim sýn­ist. Hefur þetta kennslufyrirkomulag gert það að verkum að Keilir hefur getað aðlagast breyttu skólahaldi tiltölulega fljótt og auðveldlega.  
 
Keilir stýrði á árunum 2014 - 2016 Erasmus+ verkefni um verklagsviðmið varðandi innleiðingu vendináms í skólum þar sem upplýsingatækni er notuð til að auðga námsumhverfi nemenda. Einkum var leitast við að afmarka og gera grein fyrir þeim þáttum í innleiðingarferli sem stuðla að árangursríkri notkun upplýsingatækni, einstaklingsmiðuðu námsumhverfi, og verkefnamiðuðu námi. Meðal afurða verkefnisins voru handbækur fyrir kennara sem vilja innleiða vendinám og góðar starfsvenjur í vendinámi.
 
Hægt er að nálgast upplýsingar úr verkefninu á heimasíðunni Flipped Learning in Praxis en þær geta nýst meðal annars kennurum og skólastjórnendum sem vilja aðlaga sig að breyttum kennsluháttum.