Orku- og umhverfistæknifræði og mekatróník tæknifræði í Orku- og tækniskóla Keilis

Farið er fram á að nemendur séu heiðarlegir og gangi um aðstöðu skólans af virðingu. Nemendur geta fengið lykil að skólanum en um leið gerast þeir ábyrgir fyrir því fólki sem þeir hleypa inn í skólann á sínum lykli. Komi í ljós að nemendur týna lyklinum þarf að tilkynna það eins fljótt og auðið er á skrifstofu skólans. Farið er fram á við bæði nemendur og kennara að þeir gangi frá eftir sig. Í lok kennsludags og áður en kennslustofa er yfirgefin þarf að: 

• Slökkva og ganga frá búnaði og efnum samkvæmt reglum
• Læsa gluggum
• Draga fyrir gluggana
• Slökkva ljós
• Læsa dyrum

Kennurum er heimilt að setja sérstakar reglur í námskeiðum þetta felur til að mynda í sér að kennari getur t.d. lækkað einkunn og/eða vísaði nemendum út úr stofu.

---

Verkefnavinna 

Heima- og tímaverkefni í skólanum skiptast í: 

• Einstaklingsverkefni
• Par- eða hópverkefni þar sem allir skila sameiginlegri lausn
• Par- eða hópverkefni þar sem hver nemandi skilar sér lausn

Margvísleg verkefni eru lögð fyrir í hverju fagi. Leitast er við að hafa fjölbreytni að leiðarljósi. Fjöldi verkefna á önninni er mismunandi eftir fögum.

---

Hópavinna 

Hópvinna byggist á samskiptum og að dreifa álagi. Hver og einn nemandi þarf að geta gert grein fyrir öllum þáttum verkefnisins. Nemendur sem taka ekki þátt í hópvinnu fá 0 fyrir verkefnið og geta misst próftökurétt (sjá neðar). Ef samstarfsvandamál koma upp skulu nemedur hafa strax samráð við kennara.

---

Í verkefnatímunum eru lögð fyrir verkefni sem dýpka námsefni dagsins, lagðar fyrir tímaæfingar og nemendur geta spurt spurninga. Kennari getur lagt fyrir nemendur krossapróf í verkefnatíma sem er leyst sem tímaverkefni og er hluti af verkefnaeinkunn. Eins og alltaf þá bera nemendur sjálfir ábyrgð á námi sínu og ástundun. Nemendur sem ekki mæta í fyrirlestra og/eða verkefnatíma geta ekki ætlast til að kennari fari aftur yfir efnið sérstaklega fyrir þá eða að þeir fái að taka krossaprófið sem þeir misstu af. 

---

Skilafrestur á verkefnum 

Skilafrestur á verkefnum er þremur dögum eftir dagsetningu sem kennari gefur upp. Dregið er -1 frá einkunn, fyrir hvern byrjaðan sólarhring frá skiladegi. Ekki er tekið við verkefnum eftir þrjá daga frá skiladegi. 

Dæmi: Ef skil eru á mánudegi, þá er ekki hægt að skila verkefni eftir fimmtudag. Á þetta við um alla áfanga. 

---

Ritstuldur og óhemil samvinna 

Mikilvægt er að nemendur geri sér grein fyrir því að verkefni og ritgerðir skulu vera í samræmi við fyrirmæli kennara og nemendum er í alla staði óheimilt að nýta sér hugverk annarra í ritgerðum og eða verkefnum, nema heimilda sé getið í samræmi við viðurkennd fræðileg vinnubrögð.

---

Orku- og tækniskóli Keilis fylgir alþjóðlega samþykktum stöðlum um vísindaleg vinnubrögð. Með því að skrá sig í nám hjá Orku- og tækniskóla Keilis gangast nemendur undir að fylgja þessum stöðlum í námi sínu hjá skólanum, sem og að hjálpa til við að framfylgja þeim gagnvart samnemendum sínum. Siðareglur skólans standa og falla með vilja nemenda til að viðhalda viðmiðum um vísindaleg vinnubrögð. Verði nemandi var um brot á siðareglum skólans þá ber honum skylda til að tilkynna brotið til kennara og/eða skólayfirvalda. Algengustu brotin á siðareglum skólans eru talin upp hér fyrir neðan, en athugið að listinn er ekki tæmandi. 

1. Próf. Nemendur sem veita eða þiggja hjálp meðan á prófi stendur brjóta siðareglur skólans. Þetta gildir einnig um heimapróf. 
   
   
2. Ritstuldur. Allur ritstuldur brýtur gegn siðareglum skólans. Ritstuldur er þegar nemandi skilar inn, eða kynnir, verk sem hann hefur ekki unnið sjálfur – án þess að geta uppruna þess. 
   
   
3. Notkun sömu vinnu í fleiri en einu námskeiði. Ef afrakstri vinnu sem unnin er í einu námskeiði er einnig skilað inn í öðru námskeiði – án heimildar kennara í báðum námskeiðunum – þá er það brot gegn siðareglum skólans. Markmið þessarar reglu er að nemendur fái ekki háskólaeiningar oftar en einu sinni fyrir sömu vinnu án leyfis. Nemendur sem hafa spurningar varðandi beitingu þessarar reglu í ákveðnum tilvikum skulu leita ráðgjafar hjá kennurum. 
   
   
4. Samvinna án heimildar. Það fer eftir stökum námskeiðum hvort samvinna nemenda er leyfð eða bönnuð. Ef kennari heimilar ekki sérstaklega samvinnu milli nemenda, skulu nemendur gera ráð fyrir að samvinna sé óheimil og að skil verkefna sem byggð eru á samvinnu séu brot á siðareglum skólans. Í mörgum verkefnum er nemendum skipað í hópa og þeim ætlað að vinna saman, í þeim tilvikum er samvinna með öðrum nemendum utan þess hóps óheimil – nema annað sé tekið fram. Nemendur skulu ráðfæra sig tímalega við kennara varðandi alla óvissu um samvinnu.