Vöruþróun fyrir geoSilica

Hildur Rún Sigurðardóttir Kvaran kynnir lokaverkefni sitt í Orku- og umhverfistæknifræði Háskóla Íslands og Keilis þriðjudaginn 30. maí kl. 13:00. Verkefnið nefnist: „Vöruþróun á fjórum nýjum vörum fyrir geoSilica“.

Markmið þessa verkefnis var að þróa fjórar nýjar vörur fyrir geoSilica, þar sem þróun var byggð á fræðilegum rannsóknum á virkni steinefna. Vörurnar þurftu að uppfylla reglugerðir um fæðubótarefni, auk skilyrða sem sett voru af geoSilica. Vörurnar eru allar unnar útfrá þeirri grunnvöru sem nú þegar er á markaði og þurftu þær að vera þægilegar til inntöku, bæði þegar kom að bragði og áferð. Skammtastærðir voru einnig unnar út frá fræðilegum grunni, þar sem tekið var tillit til könnunar á matarræði Íslendinga og bæði hámarks og lágmarks næringarviðmiðum. Einnig var forkönnun á fýsileika úrvinnslu valinna steinefna úr jarðhitavökva gerð, sem grunnur fyrir mögulegum frekari rannsóknum á úrvinnslu. 

Hildur Rún Sigurðardóttir Kvaran er fædd 19. júlí árið 1988 á Húsavík. Hún vann við ýmis störf þar til hún hóf nám við Háskólabrú Keilis árið 2013, þar sem hún útskrifaðist af Verk- og Raunvísindadeild árið 2014. Frá árinu 2014 hefur Hildur stundað nám í Orku- og Umhverfistæknifræði á vegum Háskóla Íslands á vettvangi Keilis þaðan sem hún mun útskrifast í vor. 


Tengt efni