Keilir er alhliða menntafyrirtæki í eigu háskóla, fyrirtækja og almannasamtaka

Keilir er hlutafélag. Meðal eigenda eru Háskóli Íslands, Þróunarfélag Keflavíkurflugvallar, rannsóknarstofnanir, orku- og fjármálafyrirtæki, sveitarfélög, almenningssamtök, flugfélag og verkalýðsfélög. 

Stjórn Keilis er skipuð eftirtöldum aðilum: Árni Sigfússon, stjórnarformaður, Jón Atli Benediktsson, varaformaður, Kjartan Eiríksson, Ásgeir Margeirsson, Þorsteinn Ingi Sigfússon, Eiríkur Hjálmarsson og Geirmundur Kristinsson. 

Framkvæmdastjóri Keilis er Hjálmar Árnason. 

Í upphafi árs 2010 eru 602 nemendur skráðir í nám hjá Keili. Keilir starfrækir bæði námsbrautir á háskólastigi og framhaldsskólastigi. Skólanum er ætlað að fylla í eyður í skólakerfinu og vera í nánum tengslum við atvinnulífið – ekki síst þau fyrirtæki sem hasla sér völl á Ásbrú. Allt nám Keilis á háskólastigi skal vottað af Háskóla Íslands, stærsta hluthafanum í Keili. Keilir byggist sem stendur upp á fjórum mismunandi skólum. 

---

Háskólabrú 

Á Háskólabrú fer fram undirbúningsnám fyrir háskólanám. Nemendur skulu hafa lokið um 70 einingum í framhaldsskóla en ljúka að ári liðnu námi á Háskólabrú sem veitir inngöngu í háskóla. Námsskrá Háskólabrúar hefur verið sniðin að óskum deilda Háskóla Íslands. Fyrrum nemendur af Háskólabrú stunda nú nám í ýmsum innlendum og erlendum háskólum. 

Forstöðukona Háskólabrúar er Soffía Waag Árnadóttir.

Heilsu- og uppeldisskóli Keilis leggur áherslu á að þróa og bjóða uppá framúrskarandi nám á sviði heilsu, heilbrigðis, íþrótta- og uppeldisfræða. Nú þegar er kennd við skólann ÍAK einkaþjálfun sem hefur vakið verðskuldaða athygli og nýtur mikilla vinsælda. Aðstaða nemenda til náms og þjálfunar er einstaklega góð í stóru fjölnota íþróttahúsi á Ásbrú. Innan heilsuskólans er m.a. unnið að nýjum námsbrautum, s.s. heilsuþjónustu, sjúkranudd og fíkniráðgjöf og forvarnir.

Forstöðukona Heilsuskóla er Gunnhildur Vilbergsdóttir.

Orku- og tækniskóli Keilis býður upp á þverfaglegt nám í orku- og umhverfistæknifræði og mekatróník tæknifræði (e. mechatronics) í samstarfi við verkfræðideild Háskóla Íslands Verklegar æfingar og rannsóknir nemenda fara fram í fyrsta flokks tilrauna- og rannsóknaraðstöðu í orkufræðum hjá Orku- og tækniskóla Keilis. Áhersla er lögð á að mennta sjálfstæða nemendur sem búa yfir mikilli greiningarhæfni, verkþekkingu og færni til að skapa og þróa nýjar tæknilausnir. Markmiðið er að útskrifaðir nemendur skólans verði eftirsóttir starfskraftar fyrir bæði íslenskan sem og erlendan orku- og tækniiðnað.

Innan Orku- og tækniskólann er boðið upp á nám í frumkvöðlanám í samstarfi við verkfræði- og náttúruvísindasvið Háskóla Íslands og Nýsköpunarmiðstöð Íslands. Frumkvöðlar tengja hugmyndir sínar við námið og þróa þær í náminu með aðstoð sérfræðinga.

Í undirbúningi er þróun námsbrautar sem kallast mun TROMP. Um að ræða eins árs nám í verkefnastjórnun og lifandi verkefnum þar sem nemendur verða þjálfaðir til að stýra atburðum af ýmsum toga með raunhæfum viðfangsefnum.

Forstöðumaður Orku- og tækniskóla er Dr. Rúnar Unnþórsson.

Flugakademía Keilis stefnir að því að hafa allt flugtengt nám undir einum hatti og skipa því verðugan sess í skólakerfinu. Þegar erum við með í gangi einka- og atvinnuflugnám, flugrekstrarnám, flugþjónustunám og nám í flugumferðarstjórn Lögð er áhersla á nútímalega kennsluhætti og kennsluumhverfi en staðsetning skólans felur í sér einstakt tækifæri til þess að skapa frábæra aðstöðu til kennslu flugtengdra greina. Þegar á Keilir fimm glænýjar og fullkomnar kennsluflugvélar af gerðinni Diamond. 

Skólastjóri Flugakademíu er Kári Kárason. 

Keilir hefur lagt þunga áherslu á að tileinka sér nýjustu og bestu tækni í fjarnámi. Margar af námsbrautum okkar má stunda í fjarnámi. Í megindráttum er það byggt upp á því að kennarar setja kynningar sínar og glærur á netið, tala skýringar sínar með, jafnvel bæta inn teikningum og skýringarmyndum eftir þörfum, slóðir að lifandi myndum o.s.frv. Nemendur geta borið fram spurningar sem kennari svarar reglulega. Þá geta nemendur spjallað saman um efnið á netinu. Aðgang að þessum þáttum hefur nemandinn hvenær sem honum hentar og jafn oft og hinum sýnist. Þannig má segja að með fullkominni tækni standi Keilir að mjög einstaklingsmiðuðu námi sem auðveldar mörgum að stunda nám.