Handbók nemenda - Háskólabrú staðnám

Keilir Haust 2016 - Birt með fyrirvara um breytingar. Smelltu á viðeigandi yfirflokka til að nálgast nánari upplýsingar. Almennar upplýsingar um húsnæðismál, skólagjöld, siðareglur, þjónustu og tölvumál má nálgast í Handbók nemenda - Almennur hluti.

  • 1 Námið

    Um leið og við bjóðum þig velkominn á Háskólabrú Keilis er mikilvægt að fara yfir nokkur hagnýt atriði varðandi uppbyggingu, skipulag og þá þjónustu er skólinn veitir.  Við vonum að handbók þessi auðveldi þér fyrstu skrefin í náminu og biðjum við þig að kynna þér innhaldið vel.

    Háskólabrú Keilis er kennd í staðnámi er hefst í ágúst ár hvert og fjarnámi er hefst í janúar ár hvert. Háskólabrúin er þróuð í samstarfi við Háskóla Íslands. Kennsluhættir eru með því móti að áhersla er lögð á kennslu og þjónustu með þarfir fullorðinna nemenda í huga. 

    Háskólabrú Keilis er tveggja til þriggja anna undirbúningur undir háskólanám. Að henni lokinni hafa nemendur öðlast ígildi stúdentsprófs og geta sótt um í háskólum.

    • 1.1 Fyrsta vikan

      Í upphafi haustannar er kynningarvika. Þessi vika er mikilvæg þar sem farið er yfir kennslukerfi Keilis, námsráðgjafi og bókasafns- og upplýsingafræðingur kynna starfsemi sína og kennarar kynna námsefni vetrarins. Farið er í hópefli þar sem nemendum gefst einstakt tækifæri að kynnast sín á milli og hrista hópinn saman fyrir áskorun vetrarins.

    • 1.2 Kennsla á Háskólabrú

      Kennsluhættir á Háskólabrú miða við þarfir fullorðinna nemenda, miklar kröfur eru gerðar um sjálfstæði í vinnubrögðum og eru raunhæf verkefni lögð fyrir.

      Eins og alltaf þá bera nemendur sjálfir ábyrgð á námi sínu og ástundun. Mikilvægt að mæta í alla kennslutíma þar sem ekki er möguleiki á að endurtaka verkefni ef nemandi er fjarverandi. 80% mætingaskylda er í staðnám Háskólabrúar. Nemendur verða að hafa fartölvu meðferðis í skólann. 

    • 1.3 Vendinám

      Á Háskólabrú er lögð megin áhersla á svokallað vendinám eða speglaða kennsluhætti (flipped classroom). Með því er átt við að hefðbundinni kennslu er snúið við. Fyrirlestrar og kynningar kennara eru vistuð á netinu. Nemendur geta horft/hlustað á kynningarnar eins oft og þeim sýnist og hvar sem þeim sýnist. Þá geta nemendur sent spurningar um efnið til kennara (eða annarra nemenda í hópnum) og fá svör á netinu sem öllum eru opin. Þá eru nemendur hvattir til að nota netið til að finna heppilegt kennsluefni.

      Kennslustundir í skólanum verða fyrir vikið öðruvísi. Þar vinna nemendur verkefnin, oftast saman í hóp, og kennarar aðstoða eftir þörfum við úrlausnir. Þar sem þetta form hefur verið reynt virðist lærdómurinn verða lifandi ferli sem virkjar nemendur á skemmtilegan hátt. Kennslan á Háskólabrú er spegluð þannig að nemendur hlusta/horfa á fyrirlestra heima en vinna heimavinnuna í skólanum. Nám er alltaf á ábyrgð nemenda og undirbúningur fyrir verkefnatímana í skólanum er nauðsynlegur til þess að vinnan í skólanum nýtist á virkan hátt.

      Keilir hefur látið vinna röð stuttra upplýsingamyndbanda um speglaða kennslu sem er hægt að nálgast á YouTube.

      Myndbönd um speglaða kennslu

    • 1.4 Fyrirvari um breytingar

      Vakin er athygli á því að allt skipulag sem birt er s.s. varðandi skipulag og annað er birt með fyrirvara um breytingar og deildarstjóri áskilur sér rétt til að breyta dagsetningum og öðru sem við kemur náminu.

    • 1.5 Verkefnavinna

      Margvísleg verkefni eru lögð fyrir í hverju fagi. Leitast er við að hafa fjölbreytni að leiðarljósi. Þannig vinna nemendur einstaklingsverkefni, paraverkefni, hópaverkefni, verkefni í tíma og heimaverkefni. Fjöldi verkefna á önninni er mismunandi eftir fögum en algengt er að nemendur skili 7 verkefnum í hverju fagi á önn.

      Algengt er að verkefni séu unnin í hópavinnu. Þar sem vinna í hóp er samvinna þá þarf hver og einn nemandi að taka virkan þátt. Verkefni sem unnin eru í tíma og gilda til einkunna er ekki hægt að endurtaka ef nemandi mætir ekki í verkefnatímann.

    • 1.6 Meðferð upplýsinga og heimilda

      Mikilvægt er að nemendur fylgi fyrirmælum skólans og kennara við lausn verkefna. Óheimilt er með öllu að nýta sér hugverk annarra í ritgerðum og verkefnum, nema heimilda sé getið í samræmi við viðurkennd fræðileg vinnubrögð. Ritstuldur er ekki liðinn við skólann, ef nemendur verða uppvísir að slíku hvort sem um ræðir verkefni eða lokapróf er nemandi áminntur og prófið/verkefnið látið niður falla.

    • 1.7 Hópar

      Í upphafi annar eru nemendur valdir saman í hópa/bekk sem haldast út önnina. Í hópavinnu hefur kennari umsjón með að skipta í hópa, þannig er séð fyrir að nemendur vinni með sem flestum yfir önnina.

    • 1.8 Verkefnaskil

      Skilafrestur á verkefnum kemur fram í kennsluáætlun kennara.  

      • Dregið er 1 frá einkunn, fyrir hvern byrjaðan sólarhring frá skiladegi. Ekki er tekið við verkefnum eftir þrjá daga frá skiladegi. Ef nemandi mætir ekki í verkefni sem unnið er í tíma eins og t.d. skyndipróf sem gildir 10% eða minna þá fær nemandinn 0 fyrir verkefnið og fær hann ekki tækifæri til að gera annað.
      • Ef um kynningu í tíma er að ræða og nemandi forfallast þá gefst honum kostur að skila útprentaðri kynningu en fær að hámarki 80%einkunn fyrir verkefnið. 
      • Nemendur verða að ná lágmarkseinkuninni 5 fyrir þau verkefni sem lögð eru fyrir í hverju fagi. Gefin er verkefnaeinkunn sem er vegið meðaltal allra verkefna vetrarins. Verkefnaeinkunn gildir yfirleitt 50% af heildareinkunn áfangans á móti prófseinkunn sem gildir 50%. Nemendur verða einnig að ná lágmarkseinkuninni 5 fyrir prófhlutann til að ná áfanganum. Lokaeinkunn samanstendur af verkefnaeinkunn og prófseinkunn.
    • 1.9 Úrsögn úr áfanga

      Nemendur í staðnámi HBR verða að segja sig úr áfanga fyrir 15. september á haustönn og 1. febrúar á vorönn til þess að geta átt námsgjöld inni.

  • 2 Moodle (kennslu- og samskiptaforrit)

    Öll námsgögn og samskipti milli kennara og nemenda fara fram í kennslu- og samskiptaforritinu Moodle. Mikilvægt er að nemendur fari reglulega inn á Moodle til að fylgjast með hverjum áfanga fyrir sig. Brýnt er að nemendur fylgist með tölvupósti daglega, allar upplýsingar frá skólanum og milli nemenda eru sendar í tölvupósti.

    Algengt er að próf hjá Keili séu tekin á tölvum í Moodle kennslukerfinu.

  • 3 Tölvusamskipti

    Eins og fram hefur komið þá er mikil áhersla á tölvunotkun hjá Keili þar sem námsgögn og samskipti fara fram í gegnum tölvur. Allir starfsmenn og nemendur Keilis eru beðnir um að hafa í huga að um tölvusamskipti gilda almennar reglur um kurteisi.

  • 4 Námsgjöld

    Nám á Háskólabrú er sett upp samkvæmt reglum LÍN sem lánar sérstaklega fyrir námsgjöldum. Námið veitir einnig þeim sem uppfylla skilyrði LÍN rétt til framfærsluláns. Nánari upplýsingar er að finna á heimasíðu LÍN. Upplýsingar um námsgjöld á Háskólabrú Keilis má nálgast hérna.

    Nemendur í staðnámi HBR verða að segja sig úr áfanga fyrir 15. september á haustönn og 1. febrúar á vorönn til þess að geta átt námsgjöld inni. Námsgjöld geta gilt á Háskólabrú í tvö ár frá því nemandi hóf nám. Athugið að 10% umsýslugjald er tekið af upphæðinni.

    Ef nemandi nær ekki lágmarkseinkunn í áfanga getur hann endurtekið hann og greiðir þá 60% af heildarverði áfangans (gildir tvö ár frá upphafi náms). Athugið að nemandi getur ekki setið einstaka áfanga oftar en þrisvar sinnum.

  • 5 Próf

    Misserispróf eru haldin í lok hverrar annar. Prófin eru ýmist skrifleg, munnleg eða verkleg.

    Lokapróf eru venjulegast þriggja tíma skrifleg próf og er það kennari sem tekur ákvörðun um tímalengd prófa hverju sinni. Prófafyrirkomulag skal þó liggja fyrir í upphafi annar í námsskeiðslýsingu. Lokapróf í áfanga eru ýmist með gögnum, án gagna, sambland af hvoru tveggja eða símatsáfangar þar sem lagt er mat á vinnu nemenda alla önnina. Í gagnaprófum reynir á skilning og heildaryfirsýn. Þannig þjálfa nemendur sjálfstæð vinnubrögð sem nýtast í háskólasamfélaginu og atvinnulífinu.

    Oft eru munnleg próf haldin í tungumálakennslu eða öðrum áföngum. Kennari skal í kennsluáætlun tilgreina hvernig fyrirkomulag munnlega prófsins skuli háttað. Kennurum er heimilt að takmarka notkun hug- eða tölvubúnaðar í prófum en slíkt þarf að koma fram í kennsluáætlun í upphafi annar.

    • 5.1 Gagnapróf og gagnalaus próf

      Próf eru ýmist gagnalaus eða með gögnum. Þegar um gagnapróf er að ræða þá mega nemendur t.d. hafa með sér skrifaðar glósur. Kennari ákveður magnið og einnig hvort hann leyfi einnig kennslubókina eða önnur gögn. Þá ákveður kennari framkvæmd prófa og er heimilt að leggja fyrir nemendur próf án gagna. 

    • 5.2 Sjúkrapróf

      Ef nemandi kemst ekki í próf vegna veikinda þarf hann að skila vottorði innan þriggja daga frá dagsetningu prófs með því að skrá sig í sjúkrapróf á heimsíðu skólans og hafa vottorðið í viðhengi.

      Skráning í sjúkra- og upptökupróf.

      Athugið að nemandi sem mætir í sjúkrapróf á ekki kost á upptökuprófi ef hann nær ekki sjúkraprófinu. 

    • 5.3 Upptökupróf

      Nemandi sem ekki nær lágmarkseinkunninni 5 á misserisprófi hefur rétt á að taka upptökupróf og greiðir fyrir það samkvæmt gjaldskrá Keilis.  Fær viðkomandi þá hæst einkunnina 5 fyrir prófið. Tímasetning upptökuprófa er auglýst sérstaklega og þarf nemandinn að skrá sig í prófið þremur virkum dögum fyrir prófdag.

      Skráning í upptöku- og sjúkrapróf.

      Ef nemandi nær ekki upptökuprófi gefst honum kostur á að sitja áfangann aftur þegar hann verður næst kenndur við Keili.

      Nemandi sem á einungis eitt fag eftir til að útskrifast af Háskólabrú vegna falls á sjúkra- eða upptökuprófi, getur sótt um að taka svokallað þriðja próf í því fagi og greiðir fyrir samkvæmt gjaldskrá. Gildir þetta um þá áfanga sem hafa hefðbundin próf sem lokanámsmat. 

      Þeir sem hafa ekki gert upp skólagjöld sín fá ekki afhentar einkunnir fyrr en greiðsla hefur borist.

    • 5.4 Prófsýning

      Prófsýning er haldin í lok hvers prófatímabils, þar sem nemendur eiga kost á að skoða úrlausn sína með kennara. 

    • 5.5 Einkunnaskali

      • 10,0 fyrir frábæra úrlausn sem sýnir skapandi, gagnrýna hugsun og innsæi. Einkunn sem einungis er gefin fyrir úrlausn sem skarar fram úr öðrum.
      • 9,0 - 9,5 fyrir mjög góða úrlausn sem sýnir sérstakan skilning og færni.
      • 8,0 - 8,5 fyrir ágæta úrlausn, sem sýnir góða þekkingu á efnisatriðum og skilning.
      • 7,0 - 7,5 fyrir úrlausn sem sýnir greinargóða þekkingu á grundvallaratriðum.
      • 5,5 - 6,5 fyrir úrlausn sem sýnir sæmilega þekkingu á grundvallaratriðum.
      • 5,0 fyrir úrlausn sem uppfyllir skilyrði um lágmarksþekkingu á grundvallaratriðum eða ef um úrbót á fyrri úrlausn er að ræða.
      • 0 - 4,5 fyrir óviðunandi úrlausn, þ.m.t. úrlausn þar sem slíkur misskilningur eða vanþekking á grundvallaratriði kemur fram að þyki óviðundandi án tillits til vægis þess þáttar sem ábótavant er innan úrlausnar.
      • M fyrir metið.
      • S fyrir staðið án prófs.
    • 5.6 Einkunnaskil

      Kennarar hafa 10 virka daga til að skila einkunnum úr lokaprófi.

  • 6 Próftökuréttur

    Nemendur skulu hafa náð 5 í veginni meðaleinkunn verkefna og hafa virt mætingaskyldu til þess að öðlast próftökurétt. Ef nemandi nær ekki tilskyldri lágmarkseinkunn eða mætingu þá telst hann fallinn á verkefnaeinkunn og telst því fallinn í áfanganum. Nemandi á kost á því að sitja áfangann aftur hjá Keili hvort heldur sem er í staðnámi eða fjarnámi. 

    Lágmarksmæting er 70% í hvern áfanga en 80% í heild. Ef mæting fer undir það missa nemendur próftökurétt. Þá er 80% mæting í símatsáfanga. Ef um langtímaveikindi er að ræða er nemendum bent á að tala við námsráðgjafa, en í þeim tilfellum má mæting aldrei fara undir 60%. Í alla verklega tíma í raungreinum er 100% mætingaskylda. Vottorð geta einungis gilt fyrir einn verklegan tíma í áfanga, nemendur skulu í slíkum tilfellum hafa samband við kennara.

    Lokaeinkunn áfangans samanstendur af prófseinkunn og verkefnaeinkunn. Nemendur þurfa að ná að lágmarki 5 úr hvorum hluta fyrir sig til þess að standast áfangann.

  • 7 Starfsfólk

    Hægt er að nálgast upplýsingar um starfsfólk Háskólabrú Keilis 2016 - 2017 hérna

    Símanúmer skrifstofu Keilis: 578 4000.

    Starfsfólk skrifstofu og kennslusviðs Keilis

    Agnar Guðmundsson Tölvudeild agnar@keilir.net
    Anna María Sigurðardóttir Kennslusvið annamaria@keilir.net
    Fjóla Þórdís Jónsdóttir Kennslusvið fjola@keilir.net
    Gísli Torfason Tölvudeild/kennslusvið gisli@keilir.net
    Sigríður Georgsdóttir Þjónustufulltrúi sigridurg@keilir.net
    Skúli Freyr Brynjólfsson Náms- og starfsráðgjafi skuli.b@keilir.net
    Venný Sigurðardóttir Þjónustufulltrúi venny@keilir.net
    Þóra Kristín Snjólfsdóttir Náms- og starfsráðgjafi thora@keilir.net