Skólanámskrá Keilis 2017

Skv. 22. gr. laga nr. 80/1996 um framhaldsskóla er hverjum skóla skylt að gefa út skólanámskrá og uppfæra hana reglulega. Skólanámskrá Keilis er nú gefin út í fyrsta skipti og stefnan er að hún verði sett á heimasíðu Keilis, en ekki sem PDF skjal.

Námskráin skiptist í tvo hluta: Almennan hluta sem hér fer á eftir um stefnu og starfshætti Keilis. Hinn hlutinn snýst um brautarskipulag og áfangalýsingar. Seinni hlutinn hefur nú þegar verið birtur á heimasíðu Keilis undir námskeiðs- og brautarlýsingar í hverri deild fyrir sig.

  • Um Keili

    Keilir, miðstöð vísinda, fræða og atvinnulífs, var stofnaður vorið 2007. Hlutverk Keilis er að byggja upp menntasamfélag í gömlu herstöðinni á Keflavíkurflugvelli og leiða saman fyrirtæki, skóla, þekkingu og fjármagn, hvoru tveggja til nýsköpunar og útrásar í íslenskum menntamálum. Félaginu er ætlað að byggja upp þekkingu, kennslu og rannsóknir á framhalds- og háskólastigi jafnt innanlands sem í alþjóðlegu samhengi.

    Keilir er hlutafélag í eigu ýmissa stofnana og fyrirtækja. Má þar nefna Háskóla Íslands, Samband sveitarfélaga á Suðurnesjum, Þróunarfélag Keflavíkurflugvallar, HS orku, Orkuveitu Reykjavíkur, Bláa lónið, Icelandair, ÍSOR, Flugstoðir, Samkaup, Kaupfélag Suðurnesja og fjölmörg önnur fyrirtæki. Hlutafé er tæpar 400 milljónir króna.

    Keilir býður upp á nám á framhaldsskólastigi og á háskólastigi

    Nám á framhaldsskólastigi er Háskólabrú (aðfaranám að háskóla), ÍAK einkaþjálfun, flugvirkjun (í samstarfi við AST skólann í Skotlandi),flugnám og fótaaðgerðafræði. Háskólabrú er kennd bæði í staðnámi og í fjarnámi með reglulegum staðlotum ÍAK einkaþjálfun er eingöngu kennd í fjarnámi með reglulegum staðlotum.

    Á háskólastigi er kennd Orku- og umhverfistæknifræði og Mekatróník tæknifræði í nafni Háskóla Íslands. Þá er kennd námsbraut ævintýraleiðsagnar og er hún vottuð af Thompson Rivers University í Kanada.

    Námið sem tilheyrir framhaldsskólastiginu er skipulagt samkvæmt kröfum sem gerðar eru til framhaldsskóla almennt en nám sem tilheyrir háskólastiginu er vottað af eða rekið í nafni viðurkennds háskóla og útskrifast nemendur frá viðkomandi háskóla. Þá fylgir flugnám allt alþjóðlegum kröfum sem Samgöngustofa hefur eftirlit með.

    Keilir tók í notkun nýtt kennsluhúsnæði haustið 2010. Um er að ræða 5.500 fermetra byggingu er áður hýsti menntaskóla Varnarliðsins. Er þar kappkostað að hafa aðbúnað sem bestan. Kennslustofur eru þannig ólíkar að stærð, gerð og búnaði. Félagsleg aðstaða og þjónusta öll á að vera til fyrirmyndar – bæði fyrir kennara og nemendur. Við Keili er einnig líkamsræktarstöð sem nemendur geta keypt sér aðgang að. Þá leigir Keilir flugskýli við flugbrautirnar undir flugvélar sínar. Ennfremur leigir Keilir glæsilega skrifstofuaðstöðu fyrir undirbúning verklegs flugs við flugbrautir. Rannsóknaraðstaða Keilis er til fyrirmyndar sem og vinnusvæði henni tengt, Smiðjan. Nemendur hafa einkar gott rými til vinnu og félagsstarfa.

  • Kennsluhættir

    Keilir hefur á síðustu árum umbreytt kennsluháttum sínum frá hefðbundnum kennsluháttum yfir í vendinám (e. flipped classroom). Með því er átt við að hefðbundinni kennslu er snúið við. Fyrirlestrar og kynningar kennara eru vistaðar á netinu. Nemendur geta horft/hlustað á kynningarnar eins oft og þeir vilja og þurfa. Þá geta nemendur sent spurningar um efnið til kennara (eða annarra nemenda í hópnum) og fá svör á netinu sem allir sjá. Þá eru nemendur hvattir til að nota netið til að finna heppilegt kennsluefni.

    Kennslustundir verða fyrir vikið öðruvísi. Þar vinna nemendur verkefnin, oftast saman í hóp, og kennarar aðstoða við úrlausnir eftir þörfum. Lærdómurinn verður lifandi ferli sem virkjar nemendur á skemmtilegan hátt. Stefnan er að halda áfram að þróa kennsluaðferðir og gera enn betur í vendinámi á komandi árum. Mikil áhersla er lögð á tölvunotkun og upplýsingatækni í skólanum og nota nemendur almennt eigin fartölvur og hafa aðgang að þráðlausu neti skólans. Í öllum áföngum er notast við kennslukerfið Moodle.

  • Grunngildi

    Grunngildi Keilis eru samstarf, virðing, framsækni og þjónusta.

    • Samstarf
      Keilir nýtir þekkingu einstaklingsins. Við komumst að sameiginlegri niðurstöðu, við erum samheldin og komum fram við aðra af heilindum. Keilir hefur bjartsýni, gleði og jákvæðni að leiðarljósi í öllum samskiptum sínum innan sem utan fyrirtækisins.

    • Virðing
      Allt starf Keilis einkennist af gagnkvæmri virðingu, umhyggju, umburðarlyndi og jafnrétti. Hverjum og einum er mætt þar sem hann er staddur.

    • Framsækni
      Með framsæknum huga og athöfnum mótum við framtíðina og sækjum alltaf áfram. Keilir er framsækinn skóli sem er fljótur til nýjunga, leitar tækifæra og býður nemendum nýjar lausnir.

    • Þjónusta
      Keilir leggur alltaf upp með að veita góða og persónubundna þjónustu og hefur frá stofnun haft hátt þjónustustig að leiðarljósi.
  • Framtíðarsýn

    Framtíðarsýn skólans er skýr. Keilir býður upp á fjölbreytt nám í hæsta gæðaflokki fyrir breiðan hóp nemenda og hefur skýr gæðaviðmið. Skólinn er í góðum tengslum við nærsamfélagið, aðliggjandi skólastig og atvinnulífið og sinnir með þeim hætti breytilegum þörfum margra. Eitt af gildum Keilis er framsækni og framtíðarsýn skólans er að sækja ávallt fram, fylgjast vel með nýjum kennsluháttum, tækninýjungum og bjóða upp á besta búnað sem völ er á hverju sinni með það að markmiði að skila vel menntuðu fólki út í atvinnulíf og framhaldsnám. Jafnframt skal lögð áhersla á skólaþróun og fagmennsku kennara.

  • Meginmarkmið

    Meginmarkmið Keilis eru:

    • Að veita ávallt framúrskarandi þjónustu
    • Að skila vel menntuðu fólki út í atvinnulífið og í framhaldsnám
    • Að styrkja menntun á Suðurnesjum
    • Að skapa eldri nemendum tækifæri til háskólanáms með aðfaranámi
    • Að byggja upp öfluga skóla og menntasamfélag á Ásbrú
  • Skipurit

  • Stjórn og stefna

    Í stjórn Keilis sitja sjö manns, tilnefndir af hluthöfum, og sjö til vara. Keili er skipt í nokkrar deildir eða skóla. Stjórnin ræður framkvæmdastjóra. Hann ræður forstöðumenn yfir einstökum deildum/skólum. Forstöðumenn skóla hafa umsjón með skipulagi, starfi og faglegu starfi innan hvers skóla, þ.m.t. mannaráðningum. Forstöðumenn eru yfir Háskólabrú, Flugakademíu, tæknifræðideild, Heilsuskóla, kennslusviði sem og rekstrarsviði en undir það fellur fjármálastjórn, markaðsmál, leiga á íbúðum og skrifstofustjórn. Forstöðumaður tæknifræðináms stýrir jafnframt Orkurannsóknum ehf. og rannsóknaraðstöðu.

    Framkvæmdastjóri og forstöðumenn deilda sitja vikulega fundi framkvæmdastjórnar.

    Stjórn Keilis 2017 - 2018 er skipuð eftirfarandi einstaklingum:

    Stjórnarformaður: Árni Sigfússon, fyrrv. bæjarstjóri Reykjanesbæjar.
    Varaformaður: Halldór Jónsson, sviðsstjóri vísindasviðs Háskóla Íslands.
    Stjórn:



     
    Sæunn Stefánsdóttir, sérfræðingur á skrifstofu rektors Háskóla Íslands.
    Kjartan Þór Eiríksson, framkvæmdastjóri Þróunarfélags Keflavíkurflugvallar.
    Ásgeir Margeirsson, forstjóri HS orku.
    Einar Jón Pálsson, fulltrúi Sambands sveitarfélaga á Suðurnesjum.
    Ásdís Kristinsdóttir, forstöðumaður Verkefnastofa Orkuveitu Reykjavíkur.
    Varamenn:





     

    Brynhildur Davíðsdóttir, dósent í umhverfis- og auðlindafræðum við Háskóla Íslands.
    Elín Rós Bjarnadóttir, frá Sambandi Sveitarfélaga á Suðurnesjum.
    Eysteinn Eyjólfsson, frá Kaupfélagi Suðurnesja.
    Hjálmtýr Hafsteinsson, dósent við verkfræði- og náttúruvísindasvið Háskóla Íslands.
    Guðbjörg Kristmundsdóttir, frá Verslunarmannafélagi Suðurnesja og Verkalýðs- og sjómannafélaginu.
    Magnea Guðmundsdóttir, markaðsstjóri Bláa Lónsins.
    Stefán Ólafsson, frá Starfsmannafélagi Suðurnesja.


    Framkvæmdastjóri og forstöðumenn eru eftirfarandi:

    • Hjálmar Árnason, framkvæmdastjóri
    • Anna María Sigurðardóttir, forstöðumaður kennslusviðs
    • Arnar Hafsteinsson, forstöðumaður Íþróttaakademíu
    • Arnbjörn Ólafsson, forstöðumaður markaðssviðs
    • Ásta Gunnarsdóttir, forstöðumaður rekstrarsviðs
    • Rúnar Árnason, forstöðumaður Flugakademíu
    • Berglind Kristjánsdóttir, forstöðumaður Háskólabrúar
    • Sverrir Guðmundsson, forstöðumaður tæknifræðináms
  • Starfsmannastefna

    Helstu efnisþættir í starfsmannastefnu Keilis eru eftirfarandi:

    1. Keilir vill vera eftirsóknarverður vinnustaður þar sem starfsfólki líður vel og því eru búin góð skilyrði til að sinna störfum sínum.
    2. Keilir vill auðvelda starfsmönnum að samræma fjölskylduábyrgð og starf.
    3. Keilir leggur áherslu á að starfsmenn eigi kost á fræðslu og endurmenntun sem eykur þekkingu þeirra í starfi.
    4. Keilir stuðlar að heilsusamlegu líferni starfsmanna.
    5. Keilir leggur áherslu á góðan starfsanda á vinnustað. Til að stuðla að því er mikilvægt að jafnrétti sé haft í heiðri, að fólk sýni hvert öðru vinsemd, umburðarlyndi og traust og að öll boðskipti innan fyrirtækisins séu jákvæð, greið og góð.
    6. Keilir væntir þess að starfsmenn vinni verk sín af fagmennsku, kostgæfni og heilindum.
    7. Keilir vill taka vel á móti nýjum starfsmönnum og stuðla að því að þeir samlagist fljótt þeim starfsmönnum sem fyrir eru.
    8. Starfsmenn Keilis eru árlega boðaðir í starfsmannaviðtal, þar sem m.a. er rætt um árangur þeirra og frammistöðu.
    9. Keilir væntir þess að starfsmenn hafi umhverfissjónarmið að leiðarljósi.
    • Fjölskylduvæn stefna

      Keilir leitast við að skapa jákvæða fjölskyldustefnu með því hlúa vel að fjölskyldunni og skapa henni þroskavænleg skilyrði.

      • Keilir leitast við að jafnvægi ríki milli fjölskyldulífs og atvinnu með því að gefa starfmönnum kost á sveigjanlegum vinnutíma eða annarri hagræðingu á vinnutíma þar sem því verður við komið.
      • Keilir leitast við að taka tillit til breytinga á persónulegum högum starfsfólks.
      • Keilir styður við fjölskylduvænar skemmtanir á vegum starfsmannafélagsins.

      Fjölskyldustefna er liður í því að auka starfsánægju starfsmanna. Aukin ánægja starfsfólks skilar sér í betri starfsanda og árangursríkara starfi. Áhersla er lögð á að bæði konur og karlar geti samræmt fjölskylduábyrgð og starf sitt hjá Keili.

      Keilir hefur hlotið viðurkenningu sem fjölskylduvænt fyrirtæki í Reykjanesbæ. Verðlaunin voru afhent á Degi um málefni fjölskyldunnar sem haldinn var í Íþróttaakademíunni í Reykjanesbæ laugardaginn 27. febrúar 2010.

    • Fræðsla og símenntun

      Keilir stuðlar að því að ráðið sé starfsfólk með fjölbreytta menntun og reynslu.

      Markmið Keilis er að rækta sem best þann mannauð sem í starfsmönnum felst. Nauðsynlegt er að starfsfólk hafi kost á að sækja nám, námskeið og ráðstefnur til að efla tengsl sín við innlenda og erlenda starfsfélaga. Námskeið og ráðstefnur sem starfsmenn sækja skulu nýtast skólanum. Það er jafnt á ábyrgð starfsmanna og stjórnenda að tryggja að endur- og símenntun sé sinnt sem skyldi. Starfsmenn sem sækja ráðstefnur og námskeið á vegum skólans skulu miðla þekkingu sinni til annarra starfsmanna eftir því sem kostur er. Umsjón með símenntun starfsmanna er í höndum hvers forstöðumanns í samráði við framkvæmdastjóra. Keilir tekur þátt í endurmenntun með beinum fjárframlögum upp að vissri upphæð og/eða með því að veita starfsfólki sveigjanlegan vinnutíma meðan á námi stendur. 

      Starfsfólk er einnig hvatt til þess að sækja um styrki til náms hjá viðkomandi stéttarfélagi.

    • Hreyfing

      Keilir leitast við að styðja starfsfólk sitt og hvetja til hreyfingar og útivistar. Við lítum svo á að ástundun heilbrigðs lífsstíls og lífshátta sé sjálfsagður og eðlilegur þáttur í starfseminni. Þetta er m.a. gert með skipulögðum viðburðum, aðgangi að íþróttahúsi, hádegislokun og öðru.

    • Framkoma og samskipti á vinnustað

      Starfsmenn skulu fylgja fyrirmælum yfirmanna og þeim reglum og leiðbeiningum sem eru í gildi. Þeir skulu sýna frumkvæði, hollustu, heiðarleika, trúmennsku og vandvirkni í starfi. Mjög mikilvægt er að starfsfólk gæti þagmælsku og sýni trúnað gagnvart samstarfsfólki og viðskiptavinum.

      Góður starfsandi eykur starfsgleði og árangur starfsmanna og gerir Keilir að eftirsóknarverðum vinnustað. Því er lagt mikið upp úr góðum starfsanda. Starfsmenn skulu vera reiðubúnir að vinna saman að sameiginlegum markmiðum og létta undir og aðstoða hvern annan ef þess gerist þörf.

      Atferli eins og einelti eða ótilhlýðileg háttsemi er alvarlegt brot og skal meðhöndlast í samræmi við Reglugerð um aðgerðir gegn einelti á vinnustað gr. 1000/2004.

      Starfsmönnum ber að viðhafa vandvirkni, varúð og góða siði í öllum samskiptum, beinum, rafrænum eða öðrum.

    • Jafnrétti kynjanna

      Gæta skal fyllsta jafnréttis milli kvenna og karla og að hver starfsmaður verði metinn á eigin forsendum. Kynbundin mismunun er óheimil í hvaða formi sem hún birtist. Stuðla skal að jafnri stöðu kvenna og karla innan Keilis og jöfnum tækifærum einstaklinga á sem flestum sviðum óháð kynferði.

      Við ákvörðun launa skal þess gætt að kynjum sé ekki mismunað. Konum og körlum skulu greidd jöfn laun og skulu njóta sömu kjara fyrir jafn verðmæt og sambærileg störf.

      Laus störf skulu standa opin jafnt konum sem körlum og tryggt skal að konur og karlar njóti sömu möguleika til endurmenntunar og starfsþjálfunar.

    • Upplýsingar og boðmiðlun

      Stuðla ber að skýrum boðleiðum og virku flæði upplýsinga milli yfirmanna og annarra starfsmanna með því að halda reglulega starfsmannafundi.

      Veikindi ber að tilkynna þeim sem starfa við símsvörun og ber þeim svo að senda tilkynningu út á viðeigandi forstöðumann.

    • Umhverfið

      Keilir hefur umhverfissjónarmið og verndun náttúrunnar að leiðarljósi í daglegum athöfnum þar sem leitast er við að hafa umgengni til fyrirmyndar í húsakynnum skólans og á lóð hans. Starfsfólki ber að taka tillit til umhverfissjónarmiða við innkaup, notkun pappírs og nota sem minnst af skaðlegum efnum og sem mest af endurnýtanlegum. Allt rusl skal flokkað og sett í þar til gerð ílát.

    • Starfsmannasamtöl

      Starfsmenn Keilis eru árlega boðaðir í starfsmannasamtöl, þar sem m.a. er rætt um árangur þeirra og frammistöðu. Um leið gefst starfsmönnum kostur á að koma sjónarmiðum sínum og óskum á framfæri.

    • Móttaka nýrra starfsmanna

      Keilir leggur mikla áherslu á að tekið sé vel á móti nýjum starfsmönnum. Nýir starfsmenn skulu fræddir um bæði almenna starfsemi skólans og þann hluta starfseminnar sem lýtur sérstaklega að starfssviði þeirra. Næsti yfirmaður ber ábyrgð á að tekið sé á móti nýjum starfsmanni og hefur umsjón með þjálfun hans, kynningu á honum fyrir öðru samstarfsfólki, tengiliðum og tryggir jafnframt að vinnuaðstaða hans sé tilbúin þegar hann hefur störf. Starfsmaður Keilis er ýmist launþegi eða verktaki og gilda sömu viðmið um báða aðila.

  • Siðareglur

    Keilir er samfélag nemenda, kennara og annars starfsfólks. Í slíku samfélagi ber öllum skylda til að taka siðferðislega ábyrgð á störfum sínum. Hverjum og einum ber að sýna virðingu, heiðarleika, sanngirni og jafnrétti í hegðun sinni, námi og störfum. 

    Siðareglur Keilis eru eftirfarandi:

    • Við stöndum vörð um heiður Keilis og aðhöfumst ekki neitt það sem kynni að vera til þess fallið að rýra álit samfélagsins á skólanum.
    • Við gætum þess að fara vel með fjármuni og aðrar eignir skólans.
    • Við sýnum hvert öðru virðingu í öllum samskiptum og komum fram hvert við annað af tillitssemi. Hvort sem um er að ræða rafræn samskipti eða hefðbundin samskipti.
    • Við gætum þess að mismuna ekki hvert öðru, til dæmis vegna kyns, kynþáttar, kynhneigðar, aldurs, fötlunar, þjóðernis, trúarbragða eða skoðana.
    • Við leggjum ekki aðra í einelti og tilkynnum skólayfirvöldum ef við verðum vitni að einhvers konar einelti eða mismunun.
    • Við vinnum saman af heilindum og látum ekki persónuleg tengsl og hagsmuni hafa áhrif á samvinnu.
    • Við setjum ekki fram verk annarra sem okkar eigin. Þegar við nýtum okkur verk annarra getum við ávallt heimilda.
    • Við þiggjum ekki hjálp meðan á prófi stendur, hvort sem prófið er tekið í skólanum eða heima.
    • Við erum virkir þátttakendur í starfi og þróun skólans og lítum á það sem skyldu okkar að miðla upplýsingum sem geta orðið til þess að bæta starf skólans.
    • Við skilum ekki verkefnavinnu úr einum áfanga sem við höfum áður skilað í öðrum áfanga  – án heimildar kennara í báðum áföngum.
    • Við vinnum ekki verkefni saman ef um einstaklingsverkefni er að ræða.

    Framkvæmdastjóri Keilis skipar einn nemanda og tvo starfsmenn í siðanefnd en okkur ber öllum að vera vakandi fyrir því að halda siðareglur skólans. Ef við verðum vör við að reglurnar hafi verið brotnar látum við námsráðgjafa vita sem kallar saman siðanefnd.

  • Eineltisáætlun

    Fram kemur í siðareglum Keilis að nemendur og starfsfólk skuli koma fram hvert við annað af kurteisi og virðingu í öllum samskiptum. Einelti er ekki liðið við skólann. Ef upp kemur grunur um einelti innan skólans er tekið á þeim málum og þau sett í ákveðið ferli.

    • Markmið eineltisáætlunar

      • Að til sé ákveðið ferli sem allir geta gengið að ef grunur leikur á einelti í skólanum.
      • Að stuðla að jákvæðum samskiptum milli nemenda og starfsfólks.
    • Skilgreining á einelti

      Einelti er neikvætt og illgirnislegt atferli sem felur í sér endurtekið áreiti og/eða ofbeldi, líkamlegt eða andlegt. Eineltinu er stýrt af einstaklingi eða hópi, beinist að öðrum og stendur yfir í nokkurn tíma. Slík samskipti einkennast af ákveðnu ójafnvægi aflsmuna eða annars valds. Einelti getur birst á mismunandi hátt, m.a.:

      • sem stríðni,
      • sem hótanir,
      • sem útilokun,
      • í formi líkamlegs ofbeldis, 

      eða sem annað niðurlægjandi áreiti s.s.:

      • Niðurlæging eða auðmýking, t.d. vegna aldurs, kynferðis, kynhneigðar eða þjóðernis.
      • Niðurlægjandi eða lítilsvirðandi texti eða myndir í tölvupósti, sms eða öðrum samfélagsmiðli.
      • Fjandskap eða þögn þegar spurt er eða fitjað upp á samtali.
      • Óþægileg stríðni eða tilraun til fyndni á kostnað annarra.
      • Rógi eða meiðandi sögusögnum er komið af stað.
      • Útilokun frá félagslegum samskiptum.
      • Særandi athugasemdir. 

      Ekki er um tæmandi yfirlit að ræða!

    • Að þekkja einelti

      Sá einstaklingur sem verður fyrir einelti eða ofbeldi segir oft ekki frá því heldur skammast sín og kennir sjálfum sér jafnvel um. Þess vegna er mjög áríðandi að allir þekki einkenni eineltis, en þau geta m.a verið þannig að nemandi:

      • Lýsir andúð á skólanum.
      • Hættir að sinna náminu, einkunnir lækka.
      • Missir sjálfstraustið.
      • Einangrast félagslega.
      • Virðist óhamingjusamur, niðurdreginn, þunglyndur eða í andlegu ójafnvægi.
      • Þjáist af svefntruflunum.
      • Hefur þreytutilfinningu eða sýnir sljóleika.
      • Neitar að segja frá hvað amar að.
      • Sýnir miklar skapsveiflur, verður árásargjarn og erfiður viðureignar.
      • Kvartar undan vanlíðan á morgnana. 

      Ef upp kemur einelti eða annað ofbeldi í skólanum er það í höndum siðanefndar skólans að vinna að lausn málsins með viðbragðsáætlun til hliðsjónar. Í siðanefnd eru Skúli Freyr Brynjólfsson náms- og starfsráðgjafi og Steinþóra Eir Hjaltadóttir starfsmaður og fulltrúi nemenda í Keili.

    • Viðbragðsáætlun

      1. Siðanefnd kölluð saman.
      2. Málið er kannað, m.a. með viðtölum við þá aðila sem eiga hlut að máli.
      3. Teymið gerir tillögur að lausn málsins innan viku frá því að það kemst upp og leggur það til að viðurlögum verði beitt. Kemur það þeim áleiðis til deildarstjóra eða næsta yfirmanns ef deildarstjóri er viðriðinn málið.
      4. Kannað verður eftir mánuð hvort málið sé leyst og eineltinu hefur linnt. Ef svo er ekki ber teyminu að leita aðstoðar aðila utan skólans við lausn málsins.

  • Jafnréttisáætlun

    Við Keili skal ríkja jafnrétti og gagnkvæm virðing meðal starfsfólks og nemenda og skulu allir njóta sanngirni og jafnra tækifæra. Í jafnréttisáætlun þessari skal tryggt að starfsmönnun sé ekki mismunað vegna kyns, aldurs, þjóðernis, kynþáttar, fötlunar eða kynhneigðar og koma í veg fyrir mismunun eða áreiti á grundvelli þessa eða annarra óviðkomandi þátta. Áætlunin á að stuðla að því að allir innan Keilis séu virtir og metnir að verðleikum og á eigin forsendum og að hæfileikar og mannauður verði sem best nýttur. 

    Ábyrgð og framkvæmd

    Allir stjórnendur skólans eru ábyrgir fyrir framgangi jafnréttismála og framkvæmd og eftirfylgni jafnréttisáætlunar. Sérstök jafnréttisnefnd fylgist með framgangi jafnréttisáætlunar og skal í febrúar ár hvert taka út og birta skýrslu um stöðu jafnréttismála innan skólans og áætlaðar aðgerðir. Jafnréttisnefnd er kjörin af framkvæmdastjórn og skulu þar sitja þrír aðilar, tveir fulltrúar starfsfólks og einn fulltrúi nemenda. Nemandinn kemur að þeim þáttum er varða nemendur.

    Áætlun um aðgerðir til að framfylgja jafnréttisstefnu

    • 1. Launajafnrétti

      Konum og körlum skulu greidd jöfn laun og skulu njóta sömu kjara fyrir sömu og jafn verðmæt störf.

      Markmið

      Að konur og karlar fái sömu laun fyrir sambærileg störf. 

      Aðgerðir

      Launaviðtöl og greining á launum í kjölfarið með það að markmiði að greina hvort um kynbundinn launamun sé að ræða. Sé um kynbundinn launamun að ræða sem ekki verður skýrður með öðru en kynferði eða öðrum óviðkomandi þáttum, skal leiðrétta þann mun svo fljótt sem auðið er.

    • 2. Laus störf, starfsþjálfun, endurmenntun og símenntun

      Hvetja skal konur jafnt sem karla til að sækja um laus störf og tryggt skal að konur og karlar njóti sömu möguleika til endurmenntunar og starfsþjálfunar.

      Markmið

      Að stuðla að jafnrétti við mannaráðningar og að öll starfsþjálfun, sí- og endurmenntun verði aðgengileg báðum kynjum.

      Aðgerðir

      Á hverju ári skal tekin saman og birt tölfræði yfir kynjasamsetningu starfsfólks. Ef um ójafnt hlutfall er að ræða skal taka tillit til þess við ráðningar. Skrá skal og safna með skipulegum hætti upplýsingum um endurmenntun starfsfólks með það að leiðarljósi að hvetja til jafnréttis og tryggja að mismunun eigi sér ekki stað.

    • 3. Samræming fjölskyldu- og atvinnulífs

      Keilir leggur áherslu á að vera fjölskylduvænn vinnustaður. Í starfsmannastefnu Keilis segir að fyrirtækið leitist við að skapa jákvæða fjölskyldustefnu með því að hlúa vel að fjölskyldunni og skapa henni þroskavænleg skilyrði. Að jafnvægi ríki milli fjölskyldulífs og atvinnu og bæði kyn eru hvött til þess að axla fjölskylduábyrgð. 

      Markmið

      Að starfsfólk finni fyrir jafnvægi milli vinnu og einkalífs. 

      Aðgerðir

      Að bjóða tímabundið upp á sveigjanlegan vinnutíma eða aðra hagræðingu til að mæta þörfum starfsfólks. Þessu er framfylgt með því að upplýsa starfsfólk um fjölskylduvæna stefnu Keilis og skyldur þeirra gagnvart fyrirtækinu í því samhengi. Ennfremur skulu þættir er varða jafnvægi ræddir í árlegu starfsmannasamtali og spurt er um jafnvægi á milli vinnu og einkalífs í ánægjukönnun starfsfólks sem gæðaráð sendir út í október annað hvert ár. Jafnréttisnefnd fær upplýsingar um niðurstöður og setur þær í árlega skýrslu sem hún skilar og kemur jafnframt með tillögur að úrbótum ef þörf er á í skýrslu.

      Tengill að fjölskyldustefnu Keilis: http://www.keilir.net/is/keilir/um-keili/starsfmannastefna 

    • 4. Kynbundin áreitni og kynferðisleg áreitni

      Starfsmenn og nemendur skulu koma fram hver við annan af virðingu og í samræmi við siðareglur Keilis. Hvers konar einelti, kynbundin eða kynferðisleg áreitni er ekki liðin við Keili.

      Markmið

      Að einelti og kynbundin og kynferðisleg áreitni nái ekki að skjóta rótum hjá nemendum og starfsfólki Keilis. 

      Aðgerðir

      Láta starfsmenn og nemendur vita að kynferðisleg áreitni og kynbundin áreitni sé ekki liðin í skólanum og láta jafnframt vita af eineltisáætlun í siðareglum. Starfsmenn verða látnir vita í árlegu starfsmannasamtali og nemendur í inntökuviðtali. Í árlegu starfsmannaviðtali skulu starfsmenn spurðir hvort þeir hafi orðið fyrir, eða orðið vitni að, einelti eða áreitni. Öllum kvörtunum og ábendingum frá starfsfólki og nemendum skal brugðist við samkvæmt áætlun. Í október annað hvert ár sendir gæðaráð út ánægjukönnun til starfsfólks og í mars ár hvert er send út könnun um líðan nemenda. Jafnréttisráð hefur aðgang að niðurstöðum og kemur með tillögur að úrbótum í skýrslu ef þörf er á.

      Tengill að eineltisáætlun Keilis: http://www.keilir.net/is/keilir/um-keili/sidareglur-keilis

    • 5. Nemendur

      Keilir leggur áherslu á að höfða til allra einstaklinga óháð kyni og að ekki séu til staðar kerfisbundnir þættir sem letja eða hindra einstaklinga af öðru hvoru kyninu í að sækja nám við ákveðnar brautir. Kynningarstarf miðast við það að laða að fólk af báðum kynjum. Kennslu- og námsgögn skulu þannig úr garði gerð að kynjum sé ekki mismunað. 

      Markmið

      Að nám við Keili höfði til allra einstaklinga óháð kyni og að kynningarstarf beri þess merki. Tryggja að kennslu- og námsgögn mismuni ekki kynjum.

      Aðgerðir

      Unnið skal markvisst að því að kynna nám, sem hallar á annað kynið, með því að hafa auglýsingar ekki kynbundnar. Jafnréttisnefnd taki saman og skili skýrslu árlega um það hvernig kynjaskipting er í hverri deild og komi með tillögur að úrbótum og fylgir því eftir að þeim sé komið í framkvæmd. Hver deildarstjóri ber ábyrgð á því að kennslu- og námsgögn mismuni ekki kynjum með því að yfirfara allt efni áður en nám hefst að hausti. Í mars ár hvert er send út könnun um líðan nemenda og hefur jafnréttisráð aðgang að niðurstöðum og kemur með tillögur að úrbótum í skýrslu ef þörf er á.

  • Umhverfisstefna

    Keilir hefur umhverfismál á stefnuskrá sinni, með sjálfbæra þróun og vernd umhverfisins að leiðarljósi. Þannig mætir Keilir þörfum samtímans án þess að draga úr möguleikum komandi kynslóða. Í skólanum starfar umhverfisnefnd og lögð er áhersla á að skólinn setji sér skýr markmið í umhverfismálum. Umhverfisstefnan og framkvæmd hennar er liður í daglegu starfi Keilis til að draga úr álagi á umhverfið, auka gæði og vekja áhuga á innra umhverfisstarfi. Stefnan tekur til allrar starfsemi Keilis þar með talið mötuneytis og ræstinga og á einnig við um innkaup, vinnuumhverfi, notkun auðlinda og meðferð efna og úrgangs. Keilir er Skóli á grænni grein og stefnir að því að flagga grænfána Landverndar innan fárra ára.

    • Keilir leggur áherslu á heilnæmt og snyrtilegt umhverfi skólans.
    • Keppa skal markvisst að því að starfsemi og rekstur skólans sé svo umhverfisvænn sem kostur er.
    • Sett skulu upp markmið sem vinna skal að til að ytra og innra umhverfi skólans sé ávallt til fyrirmyndar hvað umhverfismál og umhverfisfræðslu varðar.
    • Skólinn skal ávallt fylgjast með nýjungum á sviði umhverfismála og miðla þekkingu til nemenda og starfsfólks á markvissan hátt.
    • Umhverfisstefna skólans skal vera einföld og skýr og skal birt á vef skólans.

    Markmið

    • Að fylgja settum lögum og reglugerðum um umhverfisvernd og setja markmið til að ná þeim.
    • Að skapa Keili gott orðspor á sviði umhverfismála og vera fyrirmynd í þeim efnum.
    • Að bjóða upp á fræðslu um umhverfismál og útskrifa nemendur sem eru meðvitaðri um umhverfismál.
    • Að virkja nemendur og starfslið skólans til þátttöku í umhverfismálum.
    • Að taka fyrir ákveðin verkefni sem snerta umhverfismál á degi umhverfisins ár hvert.
    • Að taka fyrir ákveðna efnisþætti og gera nemendum og starfsfólki grein fyrir þeim.
    • Að taka þátt í sameiginlegum umhverfisverkefnum með öðrum skólum.
    • Að meta árangur í umhverfismálum í skólanum, að gera sýnilegt það sem vel er gert og leita leiða til úrbóta á því sem betur má fara.
    • Að vera í farabroddi í umhverfismálum og fylgjast með framförum Reykjanesbæjar í þeim málaflokki.

    Staðan í umhverfismálum Keilis

    • Við skólann vinnur áhugasamt fólk um umhverfismál.
    • Umhverfisnefnd Keilis,kölluð HULK, var stofnuð árið 2012 og hefur verið mjög virk.
    • Frá stofnun Keilis hefur Græna tunnan verið notuð af starfsfólki og nemendum.
    • Sorp er flokkað og sérmerktum ruslatunnum hefur verið komið fyrir víðs vegar um skólann.
    • Kassar fyrir skrifstofupappír eru við hvert skrifborð.
    • Ruslafötur hafa verið fjarlægðar frá skrifborðum.
    • Flöskum og dósum er komið í endurvinnslu.
    • Umhverfisstefna Keilis er byggð á tillögum um umhverfisstefnu í ríkisrekstri sem Umhverfisráðuneytið gaf út 1997 og samþykktar voru í ríkisstjórn sama ár.
    • Keilir er Skóli á grænni grein og stefnir á að flagga grænfánanum innan fárra ára.
    • Öll spilliefni eru flokkuð frá öðru sorpi, svo sem prentvökvi, rafhlöður, flúorperur, málning og leysiefni og þeim komið í spilliefnamóttöku.

    Helstu verkefni

    • Að hafa allan húsbúnað og búnað til vinnu og starfsaðstöðu í fullkomnu lagi svo öryggi og hreinlæti sé hvergi ábótavant.
    • Að fylgjast með orkunotkun, stilla ofnkrana og loftræsta svo orkunotkun til upphitunar verði sem hagkvæmust. Stuðla skal að sem hagkvæmastri lýsingu í húsnæði skólans utan sem innan.
    • Að gera umhverfisvæn innkaup eftir því sem mögulegt er hverju sinni. Taka skal tillit til kostnaðar og gæða vegna förgunar umbúða og mengunar við framleiðslu vörunnar eftir því sem við verður komið.
    • Að nýta umhverfisvæn hreingerningarefni eftir því sem hægt er.
    • Að flokka úrgang og stefna að því að aðeins 5-10% alls úrgangs fari sem almennt sorp til förgunar, öðru sé skilað sem hráefni til endurnýtingar og endurvinnslu.
    • Að stefna að söfnun lífræns úrgangs til moltugerðar um leið og nemendur í tæknifræði sjá sér fært að taka við honum og athugaðir verði möguleikar á metangerð á vegum skólans.
    • Að allur óskilafatnaður og skór fari til líknarfélaga svo sem Rauða krossins, Hjálpræðishersins og mæðrastyrksnefndar.
    • Drykkjarumbúðir, pappír, fernur, gler, málmar og timbur fari í endurvinnslu og lögð sé áhersla á að tyggigúmmí sé úrgangur sem eigi að fara í almennt sorp.
    • Að skýrar merkingar og leiðbeiningar um umferð og umgengni innan húss og utan séu sýnilegar, þar á meðal merkingar um að óæskilegt sé að láta bifreiðir ganga í lausagangi. Gönguleiðir séu greiðar og hjólastæði næg fyrir hjólandi vegfarendur.
  • Gæðastefna

    Gæðastefna Keilis er sett undir forystu framkvæmdastjóra Keilis. Hann ber ábyrgð á því að gæðastefnan sé í samræmi við markmið og starf Keilis. Framkvæmdastjóri skal sjá til þess að gæðastefnunni sé viðhaldið.

    Gæðastefna Keilis er birt á sérstöku skjali og er einnig aðgengileg í Handbók Keilis, sem er vistuð á innri vef skólans.

    Hlutverk Keilis er að veita nemendum sínum og viðskiptavinum sem besta þjónustu. Lögð er áhersla á að skapa sem heilbrigðast umhverfi fyrir nemendur og starfsfólk þannig að allir geti sinnt hlutverki sínu innan fyrirtækisins – hvort heldur er í námi eða annarri vinnu.

    Sérstakt gæðaráð skal leitast við að starfsemin taki sem mest mið af markmiðum starfseminnar. Í því skyni stuðlar gæðaráð að innra eftirliti, ytri úttektum sem og tillögum til úrbóta eftir því sem kostur er. Skal stöðugt leitað eftir samstarfi nemenda og starfsfólks í þessu skyni. Unnið er á grundvelli laga um framhaldsskóla 92/2008 með síðari breytingum sem og samningi Keilis við Mennta- og menningarmálaráðuneytið. Gæðaráð er skipað fjórum einstaklingum, völdum af framkvæmdastjóra.

    Samkvæmt gæðastefnu Keilis skal stöðugt leitast við að:

    • Halda uppi skýru og reglulegu innra eftirliti með úttektum og tengja við gæðastjórnun Keilis. Leita jafnframt eftir ytra eftirliti sem þjóna megi markmiðum gæðastefnu.
    • Safna sem gleggstum upplýsingum um árangur af skólastarfi, þ.m.t. árangur á prófum, umsögnum um kennara og starfsfólk, árangur nemenda að námi loknu, líðan nemenda og starfsfólks í skólanum og annað það sem kann að þjóna gæðamarkmiðum.
    • Endurskoða reglulega gæðamarkmið.
    • Taka út reglulega styrkleika og veikleika í starfinu.
    • Sjá til þess að öllum markmiðum, s.s. um fjölskyldustefnu, samfélagsábyrgð, umhverfisstefnu og fjárhagslega ábyrgð sé fylgt.
    • Tryggja að starf Keilis sé í samræmi við lög, reglugerðir og samninga er snerta starfið á einhvern hátt og sjá til þess að réttindi allra séu virt.
    • Gagnkvæm virðing sé ráðandi í umgengni þeirra er starfa og nema innan Keilis.
    • Setja ný markmið um aukna þjónustu.

    Innri úttektir veturinn 2017 - 2018

      Haustönn 2016 Vorönn 2017 Úttektaraðili  
    Kennsla og kennsluhættir x x Kennslusvið  
    Skráningarbrottfall x x Kennslusvið/fjármálasvið  
    Einkunnadreifing x x Inna  
    Líðan nemenda og þjónusta skólans   x Gæðaráð  
    Móttaka nýs starfsfólks, könnun og úttekt  x x Gæðaráð  
    Starfsmannasamtöl   x  Næsti yfirmaður  
    Aldur, kyn og búseta nemenda x  Kennslusvið  
    Úttekt á stöðu eigna   x  Allar deildir  
    Gera upp sjálfsmatsáætlun, markmiðssetning   x  Framkvæmdastjórn  
    Náms- og starfsgengi nemenda sem útskrifaðir eru   x  Allar deildir  
    Íbúakönnun   x  Húsnæðissvið  
    Gæðakönnun fyrir flugakademíu x  Flugakademía  
    Sjálfsmatsskýrsla deilda   x  Allar deildir  
    Mat á prófum (á ekki við um Flugakademíu) x x  Kennslusvið/deildir  
    Ánægjukönnun starfsfólks Keilis   x Kennslusvið  
    Prófanir í tölvudeild x x  Tölvudeild  
             


    Sjálfsmatsskýrslur gæðaráðs er hægt að nálgast á heimasíðu Keilis.

  • Öryggisnefnd

    Öryggisnefnd Keilis leitast við að tryggja öruggt og heilsusamlegt starfsumhverfi fyrir starfsfólk og nemendur og fylgir aðgerðaáætlunum vegna slysa og skyndilegra veikinda. Í öryggisnefnd sitja fjórir starfmenn sem framkvæma árlegar úttektir á öryggi skólans, þar af eru tveir öryggistrúnaðarmenn og tveir öryggisverðir.

  • Forvarnastefna

    Keilir vill stuðla að heilbrigðum lífsháttum og jákvæðri lífssýn nemenda sinna. Með þetta að markmiði er starfandi forvarnarteymi í skólanum sem er boðberi forvarna innan skólans og heldur utan um alla fræðslu í forvörnum.

    Helstu verkefni forvarnarteymis er að:

    • vinna að heilbrigðu og fjölbreyttu félagslífi með nemendum
    • standa að fræðslu um forvarnir og heilbrigðan lífsstíl
    • vera virk og fyrirbyggjandi fyrir nemendur
    • miðla upplýsingum til foreldraráðs
    • taka þátt í gæslu á dansleikjum

    Markmiðið með forvörnum er að:

    • efla heilbrigt félagslíf
    • stuðla að fræðslu um forvarnir sem leiðir til heilbrigðs lífs
    • hafa til reiðu upplýsingar um forvarnir og meðferð ungs fólks 
  • Heilsueflandi skóli

    Keilir hefur kynnt sér vel átaksverkefnið heilsueflandi framhaldsskóli sem unnið er í samvinnu við Lýðheilsustöð og stefnir á að taka þátt í því verkefni á komandi skólaári. 

  • Heilsugæsla

    Eins og er býður Keilir ekki upp á þjónustu hjúkrunarfræðings, en námsráðgjafar skólans þekkja vel til heilbrigðisþjónustu á Suðurnesjum og komi upp einhver vandamál er tengjast heilsu, svo sem átröskun, megrun, offitu, vímuefni, einelti, sjálfsvígshugsanir eða annað, er hægt að leita til námsráðgjafa sem koma nemendum í samband við viðeigandi fagaðila.

  • Áfallaáætlun

    Áætlun þessi er leiðarvísir fyrir starfsmenn Keilis þegar upp koma áföll eða aðrar viðlíka aðstæður sem þarf að bregðast við á skjótan og fumlausan hátt. Aðstæður og atvik sem leiða til þess að áfallaáætlun sé sett í gang geta t.d. verið:

    • Alvarleg veikindi
    • Slys
    • Dauðsfall
    • Ógnvekjandi aðstæður
    • Aðrar aðstæður sem leitt geta til ótta, streitu eða annarra slíkra viðbragða.

    Gildir einu hvort hér er um að ræða nemendur, starfsmenn eða aðstandendur.

    Mjög mikilvægt er að tryggja frá upphafi að allar upplýsingar séu réttar og þeim komið rétt til skila til þeirra sem við á. Með því skal fyrirbyggt að rangar og villandi upplýsingar komist í umferð sem geta magnað upp viðbrögð fólks. Á hverjum tíma skal vera starfandi áfallateymi sem þekkir þessa áætlun og er tilbúið að vinna samkvæmt henni þegar þörf er á.

    Í áfallateymi Keilis sitja:

    • Framkvæmdastjóri
    • Kennslustjóri
    • Námsráðgjafi
    • Þjónustufulltrúi

    Teymið kallar auk þess til deildarstjóra þeirrar deildar sem um er að ræða, svo og sérfræðinga s.s. sálfræðing, prest eða aðra eftir aðstæðum.

    Aðili sem fær upplýsingar um alvarleg veikindi, slys, eða dauðsfall skal koma þeim til einhvers meðlima áfallateymis sem kallar teymið strax saman.

    • Fyrstu viðbrögð teymisins

      1. Teymið hittist stuttlega, fer yfir fyrirliggjandi staðreyndir málsins og aflar sér strax áreiðanlegra viðbótarupplýsinga sé eitthvað óljóst.
      2. Teymið gerir áætlun um næstu skref og skiptir með sér verkum.
      3. Eftirtalin atriði þarf að hafa í huga þegar næstu skref eru ákveðin:

        Hverjir standa næst viðkomandi sem þarf að sinna sérstaklega?
        Hvernig verður samskiptum við aðstandendur háttað?
        Hvernig verður upplýsingagjöf innan starfsmannahópsins háttað?
        Hvernig verður upplýsingagjöf til nemenda háttað?
        Hvernig verður upplýsingagjöf háttað á opinberum vettvangi?
        Þarf að kalla til prest, sálfræðing eða aðra sérfræðinga?

      4. Teymið hittist aftur í lok dags, fer yfir það hvernig dagurinn hefur gengið og hvernig vinnsla málsins verður í framhaldinu.
    • Alvarleg veikindi eða slys í skólanum

      1. Sá starfsmaður sem fyrstur kemur að atviki veitir fyrstu hjálp, hringir í 112 og kallar eftir aðstoð innanhúss.
      2. Þegar fleiri starfsmenn eru komnir að atviki tekur einn starfsmaður að sér stjórn á vettvangi með afgerandi hætti.
      3. Meðlimir áfallateymis leita staðfestingar á því að hringt hafi verið í 112.
      4.  Haft er samband við aðstandendur viðkomandi einstaklings til að tilkynna um atburðinn.
      5. Skrá skal niður hvaða nemendur og starfsmenn urðu vitni að því sem gerðist til að tryggja að þeir fái viðeigandi aðstoð í kjölfarið, en ekki síður til að vita hverjir geta vitnað um atburðinn.
      6. Einn starfsmaður fylgir þeim veika/slasaða í sjúkrabíl og er með viðkomandi a.m.k. þangað til aðstandendur koma á staðinn.
      7. Starfsmönnum og nemendum er tilkynnt um atburðinn eins fljótt og nokkur kostur er.
      8. Frekari vinnsla er ákveðin í samráði við hinn veika og/eða aðstandendur hans.
    • Dauðsfall í skólanum

      1. Sá starfsmaður sem fyrstur kemur að atviki veitir fyrstu hjálp, hringir í 112 og kallar eftir aðstoð innanhúss.
      2. Þegar fleiri starfsmenn eru komnir að atviki tekur einn starfsmaður að sér stjórn á vettvangi með afgerandi hætti.
      3. Meðlimir áfallateymis leita staðfestingar á því að hringt hafi verið í 112.
      4. Samráð er haft við lögreglu um það hvernig tilkynningu til aðstandenda verður háttað.
      5. Kallað er eftir tafarlausri aðstoð prests, sálfræðings eða annarra sérfræðinga sem talin er þörf á.
      6. Skrá skal niður hvaða nemendur og starfsmenn urðu vitni að því sem gerðist til að tryggja að þeir fái viðeigandi aðstoð í kjölfarið, en ekki síður til að vita hverjir geta vitnað um atburðinn.
      7. Tryggja skal að enginn sem varð vitni að atvikinu fari úr húsi án þess að hafa fengið viðeigandi aðstoð og upplýsingar um það hvaða aðstoð muni bjóðast í framhaldinu. Huga skal sérstaklega að því í hvaða aðstæður viðkomandi fer þegar hann yfirgefur húsið, þ.e. hvort hann muni keyra einn eða vera einn næstu klukkustundirnar.
      8. Öðrum starfsmönnum og nemendum er tilkynnt um atburðinn eins fljótt og nokkur kostur er.
      9. Þegar allir aðilar hafa verið upplýstir er fáni dreginn í hálfa stöng.
      10. Áfallateymi sér til þess að aðstandendum sé send samúðarkveðja og blómvöndur. Jafnframt er boðin aðstoð skólans við útfararundirbúning og útför eftir því sem við á.
    • Dauðsfall starfsmanns eða nemanda utan skólans

      1. Fengin er staðfesting á andláti og upplýsinga leitað um aðdraganda þess.
      2. Fulltrúi áfallateymis hefur samband við aðstandendur varðandi framhaldsvinnslu málsins.
      3. Starfsmönnum, og eftir atvikum nemendum, er tilkynnt strax um andlátið.
      4. Kallað er eftir aðstoð prests, sálfræðings eða annarra sérfræðinga sem talin er þörf á.
      5. Þegar allir aðilar hafa verið upplýstir er fáni dreginn í hálfa stöng.
      6. Áfallateymi sér til þess að aðstandendum sé send samúðarkveðja og blómvöndur. Jafnframt er boðin aðstoð skólans við útfararundirbúning og útför eftir því sem við á.
    • Stuðningur eftir áfall

      1. Venjubundið skólastarf sefar óttann og kvíðann sem fylgir áföllum. Mikilvægt er að starfsmenn skólans séu eins eðlilegir og hlýlegir og þeim er unnt. Tillitssemi og virðing felst m.a. í því að staldra ekki of lengi við áföllin heldur halda áfram lífsgöngunni þó sorgin sé til staðar.
      2. Hlúð að nemendum. Nemendum gefinn kostur á að vinna með tilfinningar sínar. Boðið upp á einstaklingsviðtöl. Nauðsynlegt getur reynst að fá utanaðkomandi aðstoð til að álag verði ekki of mikið á starfsfólk skólans, t.d. sálfræðing, prest, áfallateymi við heilsugæslustöðvar o.s.frv.
      3. Hafi nemandi eða starfsmaður látist er hins látna minnst með sameiginlegri athöfn í umsjá prests. Ritari sér um að minningabók liggi frammi sem og mynd af viðkomandi. Húsvörður flaggar á jarðarfarardag.
      4. Votta samúð. Hafa samband við fjölskyldur sem hafa orðið fyrir missi og votta samúð. Minningargreinar, kransar og blóm frá bekknum/skólanum.
      5. Haldið áfram næstu vikur og mánuði að hlúa að nemendum og starfsfólki skólans. Gefa skal gaum að áfallastreitu meðal nemenda og starfsmanna skólans. Boðið verður upp á hópviðtöl eða einstaklingsviðtöl ef þörf er á undir stjórn til þess hæfra einstaklinga. Áfallaráð metur hvort þörf sé á viðtölum.

  • Viðbragðsáætlun

    • Viðbrögð við eldsvoða - Hlutverk yfirmanna

      • Umsjónarmaður skóla/ skólastjórnandi fari að stjórntöflu brunaviðvörunarkerfis og kanni hvaðan brunaboðið kemur. Ef ekki er slökkt á brunaboðanum innan tveggja mínútna eiga allir að yfirgefa bygginguna. Rýming er alltaf undirbúin um leið og heyrist í brunaboðanum.
      • Umsjónarmaður skóla/ skólastjórnandi hefur samband við 112, tilkynnir um eld eða gefur skýringar á brunaboðinu. Ef um falsboð er að ræða er slökkt á brunavælum sem gefur til kynna að hættuástand sé liðið hjá.
      • Umsjónarmaður skóla/ skólastjórnandi gefur til kynna hvar best er að koma að skólabyggingunni.
    • Viðbrögð við eldsvoða - Hlutverk allra starfsmanna

      • Að virða brunaboðin og aðstoða við rýmingu.
      • Kennarar/starfsmenn undirbúa rýmingu kennslustofu/rýmis síns, nemendur yfirgefa ekki kennslustofuna/rýmið fyrr en kennari/starfsmaður hefur kannað hvort útgönguleiðin er greið. Hver kennari/starfsmaður er ábyrgur fyrir þeim bekk/hóp sem hann er að kenna þegar hættuástand skapast. Ætíð skal velja þann neyðarútgang sem næstur er samkvæmt leiðbeiningum eða sem er greiðastur.
    • Aðbúnaður

      • Byggingin er vöktuð með brunaviðvörunarkerfi sem er tengt við Öryggismiðstöð Íslands.
      • Brunasamstæður byggingarinnar eru þrjár og er hver samstæða með mörgum brunahólfum.
      • Út úr hverri samstæðu eru flóttaleiðir auk flóttaleiða og björgunaropa úr sumum brunahólfum.
      • Neyðarlýsing og útljós eru á öllum flóttaleiðum svo og brunaslöngur og handslökkvitæki.
      • Uppdráttur er sýnir útgönguleiðir og flóttaleiðir er í hverju kennslurými, anddyri og skrifstofuálmu.
    • Viðbrögð við eldsvoða - Rýmingaráætlun

      • Nemendur gangi út undir handleiðslu kennara/starfsmanns.
      • Sá aðili sem síðastur fer út úr viðkomandi rými loki hurð á eftir sér til að hindra flæði reyks og elds.
      • Mikilvægt er að fara á fyrirfram ákveðið söfnunarsvæði til að auðvelda könnun á því hverjir séu mættir og hverja vantar. Kennari ber ábyrgð á nafnakalli.
      • Upplýsingar skulu gefnar til umsjónarmanns söfnunarsvæðis sem síðan gefur upplýsingar til skólastjórnenda.
      • Starfsfólk skrifstofu aðstoðar við rýmingu. Ef hlé er þegar eldur kemur upp þá eiga starfsmenn að fara hver á sitt svæði.
      • Skólastjórnandi/umsjónarmaður kynnir sér aðstæður og tekur á móti slökkviliði og gefur nákvæmar upplýsingar.
      • Liggja þarf fyrir hvort og þá hvað margir eru enn innandyra þegar slökkvilið kemur.
      • Slökkvilið stýrir aðgerðum við komu þess og enginn fer inn í bygginguna nema með leyfi varðstjóra/slökkviliðsstjóra. Leyfa má að flytja fólk á milli brunasamstæða sé tryggt að brunahólfun haldi.
    • Viðbrögð við jarðskjálfta

      • Sýnið stillingu og forðist vanhugsaðar aðgerðir. Alls ekki hlaupa ráfandi um.
      • Farið undir borð, út í horn eða í dyragætt og bíðið þar til skjálftinn er yfirstaðinn.
      • Þegar skjálftinn er yfirstaðinn skal yfirgefa bygginguna undir handleiðslu kennara sem skal gæta vel að öllum hættum og vekja athygli nemenda á þeim og fara á söfnunarsvæði fjarri byggingum og ljósastaurum.
      • Kennari kanni hvort einhvern vanti í hópinn og sé svo skal láta umsjónarmann söfnunarsvæðis vita sem kemur upplýsingum til björgunarliða.
      • Starfsfólk rói nemendur.
      • Huga skal að fyrstu hjálp fyrir þá sem þess þurfa.

  • Skólareglur

    • Umgengnisreglur

      • Sýna ber háttvísi og prúðmennsku í skólanum og alls staðar þar sem komið er fram í nafni hans.
      • Nemendur mæti stundvíslega í allar kennslustundir, virði verkstjórn kennarans og gæti þess að trufla ekki vinnufrið.
      • Reykingar og tóbaksnotkun eru bannaðar í skólahúsinu og á skólalóð.
      • Neysla áfengis og annarra vímuefna eða að vera undir áhrifum slíkra efna ef með öllu óheimilt í skólahúsinu.
      • Neysla matar og drykkjar skal aðeins neyta í matsal. Öllu rusli skal henda í ruslafötur.
      • Bílum skal leggja þannig að þeir hindri ekki umferð og virða skal sérmerkt stæði fatlaðra.
    • Skólasóknarreglur og fjarvistir

      Keilir skiptist í fjóra mismunandi skóla með ólíkum reglum um skólasókn, fjarvistir og veikindi. Hægt er að nálgast skólasóknarreglu hvers skóla fyrir sig í nemendahandbókum á heimasíðu Keilis.

    • Prófareglur

      • Nemendur eiga að vera mættir í prófstofu a.m.k. 5 mínútum áður en próf hefst.
      • Prófstofu lokar um leið og uppgefinn próftími hefst.
      • Óheimilt er með öllu að hafa samband við aðra nemendur á próftíma.
      • Öll rafræn samskipti eru bönnuð og hafa skal slökkt á öllum samskiptatækjum á meðan próf stendur yfir.
      • Slökkt skal vera á símum og þeim skal skilað á tiltekinn stað ásamt yfirhöfnum og töskum.
      • Nemendur skulu hafa með sér gild skilríki með mynd og hafa þau aðgengileg fyrir prófayfirsetufólk á meðan að próf stendur yfir.
      • Óheimilt er að yfirgefa prófstofu fyrstu klukkustundina í prófum sem eru lengri en 2 klst.
      • Óheimilt er að fara út úr prófstofu og koma inn aftur í prófum sem eru styttri en 2 klst. Þetta á einnig við um salernisferðir. Nemendur sem þurfa af einhverjum ástæðum að nota salerni ört eru beðnir um að vera í sambandi við námsráðgjafa a.m.k. 24 klst. fyrir próf.
      • Nemandi skal skila öllum gögnum að prófi loknu, þar með talið rissblöðum, prófabókum og prófinu sjálfu.
      • Ef nemandi lýkur prófi áður en próftíma lýkur skal hann rétta upp hönd og láta yfirsetu vita, skila úrlausn en skilja allt dót, þar með talið tölvur, eftir á borði og læðast út.
      • Hafa skal hljóð á göngum fyrir framan prófstofur á meðan að próftími stendur yfir.
      • Tóbaksneysla og neysla matvæla er ekki leyfileg á meðan próftíma stendur.
      • Nemandi skal merkja prófblöð vel með nafni, kennitölu og dagsetningu.
      • Öllum frágangi á prófaúrlausn skal vera lokið innan próftímans.
    • Próf tekin á tölvu

      • Ef próf er tekið á tölvu þarf nemandi að vista prófið undir eigin nafni á tölvuna sína, með því að fara í save target asog vista það í ákveðinni möppu. Munið eftir að vista reglulega.
      • Ef nemandi lendir í vandræðum með að senda prófið á prof@keilir.net eða moodle lætur hann tölvumann vita sem kemur og fylgir viðkomandi að tölvunni og leysir úr hans málum.
    • Próf tekið á pappír

      • Á prófborði skulu ekki vera nein gögn önnur en prófgögn, skilríki og leyfileg hjálpargögn samkvæmt fyrirmælum hverju sinni.
      • Pennaveski skal vera undir prófborði í gagnalausum prófum.
      • Hafi nemandi af misgáningi tekið með sér óleyfileg gögn ber honum strax að afhenda þau prófayfirsetufólki.
      • Brot á prófreglum geta varðað vísun frá prófi eða úr áfanga eftir atvikum, svo og viðurlög, skv. gildandi lögum og reglum Keilis.
    • Kæruréttur nemenda

      Komi upp ágreiningur um námsmat á prófi á nemandi kærurétt varðandi námsmatið með ákveðnum skilyrðum þó og á þá rétt á að fá prófdæmingu óháðs prófdómara sem sker úr um ágreining um námsmat.

      Prófsýning er staður og stund fyrir afgreiðslu slíkra mála. Þá getur nemandi fengið að skoða prófúrlausn og einkunn og farið yfir málin ásamt kennara í viðkomandi fagi. Ef nemandi hefur hug á að kæra námsmat á prófi má kennari ekki afhenda honum prófúrlausnina, en nemandinn á rétt á að fá ljósrit af prófúrlausn sinni, því prófúrlausn skal vera stöðugt í vörslu kennara eða annarra starfsmanna skólans uns prófdómari tekur við henni.

      Kæra nemanda skal vera skrifleg með rökstuðningi um ágreiningsefni og berast kennslustjóra innan 48 klst. frá því að nemanda var birt einkunn og/eða hann átti þess kost að skoða prófúrlausn á prófsýningu. Sé einkunn yfir 5 skal þessi rökstuðningur fela í sér alvarlegar aðfinnslur eða ásakanir.

      Prófdæming snertir einungis þau atriði sem nemandi hefur rökstutt skriflega sem ágreiningsefni.

      Kennari skal eiga þess kost að skila sjálfstæðri skriflegri greinargerð um forsendur mats á kærðri úrlausn sem ásamt kæru nemanda gengur til prófdómara. Þá skal hann og skila kennslustjóra í ljósriti a.m.k. fjórum úrlausnum annarra nemenda sem prófdómari fái til samanburðar.

      Ef kennari telur eftir ítrekaðar athugasemdir nemenda að annmarkar kunni að vera á prófi, ellegar ef kennari hefur þurft að sitja undir ásökunum um slíkt án þess að telja að þær eigi við rök að styðjast, hefur hann þann kost að láta skjóta prófinu í dóm óháðs prófdómara. Það gerir hann með því að fara fram á slíkt við kennslustjóra sem tekur að sér framkvæmd málsins. 

    • Viðurlög

      Almenn viðurlög við ritstuldi, broti á siðareglum og öðrum meginreglum skólans eru eftirfarandi:

      • Fyrsta brot: Forstöðumaður/deildarstjóri ræðir við nemandann og honum gefin kostur á að koma með sína hlið á málinu. Ef um brot er að ræða er nemandanum veitt áminning.
      • Annað brot: Við annað brot vísar forstöðumaður/deildarstjóri málinu til kennslunefndar sem víkur nemandanum úr skóla. Kennslunefnd afhendir nemanda skriflega brottvísun.

      Í undantekningartilvikum áskilur skólinn sér rétt til að vísa nemanda úr námi fyrirvaralaust.

    • Kennslunefnd

      Hjá Keili er starfandi kennslunefnd sem úrskurðar um mál sem ná ekki að leysast hjá viðkomandi deildum. Kennslustjórar taka við málum sem óskað er að kennslunefnd taki fyrir.

    • Námsmat

      Námsmati er ætlað að meta hvernig nemanda hefur gengið að tileinka sér námsmarkmið hvers áfanga. Námsmat í Keili er mjög fjölbreytt og töluvert um að gefnar séu einkunnir á grundvelli símats, þ.e. án þess að fram fari sérstakt lokapróf. Í kennsluáætlunum kemur fram hvernig námsmati er háttað og er það breytilegt eftir eðli áfanganna. Einkunnir eru birtar á Innu.

  • Umsóknarferli

    Upplýsingar um umsóknir og umsóknarferli á hverjum tíma fyrir sig má nálgast á heimasíðu Keilis undir umsóknir. Þar er jafnframt hægt að sjá hvaða námsbrautir eru í boði þá stundina. Inntökuskilyrði er misjafnt eftir námi og upplýsingar um inntökuskilyrði er hægt að sjá á heimasíðu Keilis undir upplýsingum um hvert námi fyrir sig.

    • Inntökuferli

      Nemendur sækja um nám á heimasíðu Keilis. Allir umsækjendur sem uppfylla skilyrði eru teknir í viðtal þar sem farið er yfir það hvort þeir eigi erindi í námið og allir helstu þættir er við koma náminu og skólanum eru ræddir.

    • Inntökuskilyrði

      Háskólabrú

      Gerð er krafa um að nemendur hafi lokið 117 feiningum (framhaldsskólaeiningum) eða 70 einingum á framhaldsskólastigi. Þar af þurfa umsækjendur að hafa lokið að minnsta kosti 6 feiningum í stærðfræði, 6 feiningum í íslensku og 6 feiningum í ensku. Háskóli Íslands gerir þær kröfur að umsækjendur hafi náð 25 ára aldri. Umsækjendur eiga möguleika á að fá starfsreynslu sína metna til eininga að hluta upp í þær lágmarkseiningar sem krafist er.

      ÍAK einka- og styrktarþjálfun

      Gerð er krafa um að umsækjendur hafi haldgóða reynslu af íþróttum og líkamsrækt og séu í góðu líkamlegu formi. Þeir sem hafa lokið öðru einkaþjálfaraprófi eða stúdentsprófi njóta forgangs í námið. Gerð er lágmarkskrafa um 18 ára aldur og 70 einingar í framhaldsskóla. Þar af skulu hið minnsta 9 vera í ensku, 6 í íþróttum, 6 í stærðfræði, 3 i eðlisfræði og 3 í upplýsingatækni.

    • Skólagjöld

      Skólagjöld eru innheimt fyrir hverja önn sérstaklega. Þau miðast við staðgreiðslu og skulu vera að fullu greidd í upphafi hverrar annar samkvæmt útgefnum gjalddaga hverju sinni.

      Skuldi nemandi skólagjöld frá fyrri önnum getur hann ekki innritast í nám á næstu önn fyrr en skuldin hefur verið greidd. Þeir sem hafa ekki gert upp skólagjöld sín fá ekki afhentar einkunnir fyrr en greiðsla hefur borist. Þeir nemendur sem hafa ekki greitt skólagjöld sín þegar nám er hafið geta átt von á að lokað verði á aðgang þeirra að kennslukerfi skólans án fyrirvara.

  • Námsferill

    • Skráning og meðferð upplýsinga

      Skólinn skráir námsferla nemenda, námsárangur, viðveru og fleiri upplýsingar sem varða skólagöngu þeirra með rafrænum hætti í gagnagrunn (Innu) sem þjónustufulltrúar, kennarar, námsráðgjafar og skólastjórnendur hafa aðgang að.

      Starfsfólk skólans sem hefur aðgang að gögnum um nemendur er bundið trúnaði og er þeim óheimilt að veita persónuupplýsingar um nemanda án samþykkis þess sem í hluta á og forráðamanna ef um er að ræða nemanda yngri en 18 ára.

    • Aðgangur nemenda og forráðamanna þeirra að upplýsingum

      Allir nemendur skólans fá lykilorð að Innu sem veitir honum aðgang að öllum rafrænum upplýsingum sem skráðar eru um hann sjálfan. Sé nemandi yngri en 18 ára geta forráðamenn hans einnig fengið lykilorð sem veitir aðgang að sömu upplýsingum. Forráðamenn geta einnig fengið upplýsingar um námsframvindu nemandans með því að hafa samband við skólastjórnendur þangað til nemandinn verður 18 ára. Eftir það er einungis heimilt að veita honum sjálfum, eða þeim sem nemandinn veitir skriflegt umboð, upplýsingar um mál er varða hann persónulega.

  • Foreldraráð

    Í lögum um framhaldsskóla frá árinu 2008, 50. grein, segir að í framhaldsskólum skuli starfa foreldraráð. Er það í samræmi við að sjálfræðisaldur ungmenna er 18 ár og þangað til bera forráðamenn ábyrgð á börnum sínum.

    Hingað til hefur Keilir ekki boðið upp á nám fyrir nemendur yngri en átján ára og því hefur foreldraráð ekki verið sett á laggirnar. Aftur á móti er stefna Keilis að fara af stað með nám fyrir 16 ára nemendur og þá verður foreldraráð strax virkjað. Fjórir forráðamenn nemenda við skólans munu sitja í ráðinu ásamt tveimur varamönnum, og einum tengilið við stjórnendur skólans. Meginverkefni foreldraráðs eru að styðja við skólastarf, efla tengsl forráðamanna ólögráða nemenda og skólans og huga að hagsmunamálum nemenda. Foreldraráðið mun móta sér starfsreglur og verksvið.

  • Samstarf við aðra skóla, aðila á vinnumarkaði og nærsamfélag

    Keilir eru í góðu samstarfi við aðra skóla, vinnumarkaðinn og nærsamfélagið.

    Helstu samstarfsaðilar ÍAK einkaþjálfunar og Háskólabrúar eru eftirfarandi:

    • ÍAK á í samstarfi við tvær líkamsræktarstöðvar; World Class og Sporthúsið. Samstarfið felst í að nemendur og kennarar ÍAK fái aðgang að öllum stöðvum fyrirtækjanna á meðan á námi stendur án endurgjalds.
    • ÍAK hefur í gegnum fagsamtökin National Strength and Conditioning Association (NSCA) sótt marga erlenda fræðimenn á sviði þjálfunarfræða og næringarfræða til kennslu í námsbrautum skólans en einnig til að halda fyrirlestra og stök námskeið fyrir starfandi einkaþjálfara.
    • ÍAK er í umsóknarferli fyrir evrópska gæðavottun á námsbrautina í einkaþjálfun, EHFA, sem er samþykkt sem EQAVET vottun. Búist er við að ÍAK verði komin með vottunina á haustönn 2015.

    Háskólabrú

    • Háskólabrú hefur verið í nánu samstarfi við Háskóla Íslands með undirritun samstarfssamnings milli skólanna. Fagráð Háskólabrúar er skipað tveimur fulltrúum Háskólabrúar og þremur fulltrúum Háskóla Íslands.
    • Nám á Háskólabrú hefur verið samþykkt hjá öllum háskólum hérlendis.
    • Gott samstarf er á milli Háskólabrúar og símenntunarstöðva sem eru víðs vegar um landið. Sérstaklega er náið samstarf við Miðstöð símenntunar á Suðurnesjum (MSS), Mími símenntun í Reykjavík og Símey (símenntunarstöðvar Eyjafjarðar). Árið 2009 undirbjó Keilir námsleið í samstarfi við MSS er heitir Menntastoðir sem er undirbúningur fyrir nám á Háskólabrú. Fleiri símenntunarstöðvar hafa tekið upp þessa námsleið og Fræðslumiðstöð atvinnulífsins hefur sett þessa námsleið inn í kennsluskrá sína. Frá árinu 2010 hefur Háskólabrú verið með nemendur í staðnámi í samstarfi við Símey. Einnig hafa fjarnemar á Háskólabrú nýtt aðstöðu fræðslumiðstöðvanna víðs vegar um landið til að taka próf. Starfsfólk Háskólabrúar heimsækir reglulega aðila fræðslumiðstöðva og tekur sömuleiðis á móti þeirra starfsfólki. Einnig hafa nemendur Menntastoða símenntunarstöðvanna komið reglulega á kynningar á Háskólabrú.
    • Háskólabrú er í góðu samstarfi við endurhæfingarstöðvar eins og Hringsjá og Virk þar sem skjólstæðingar þeirra hafa komið reglulega til okkar í námskynningar.
    • Háskólabrú hefur verið í samstarfi við Vinnumálastofnun um námsleiðir fyrir skjólstæðinga þeirra
    • Háskólabrú tekur þátt í alþjóðlegu Erasmus-verkefni um vendinám sem Keilir stýrir. Margir kennarar á Háskólabrú taka þátt í því verkefni ásamt skólum og stofnunum frá fimm þjóðríkjum. Verkefnið á að klárast 2017 þar sem vendinám sem kennsluaðferð er skoðuð frá ýmsum sjónarhornum og afurð verkefnisins verður m.a. handbók um vendinám.
    • Starfsfólk Háskólabrúar hefur tekið á móti fjölda af kennurum og skólafólki í Keili vegna áhuga þeirra á vendinámi og skipulagi þeirrar kennsluaðferðar hér á Háskólabrú. Skiptir fjöldi áhugasams skólafólks sem okkur hafa heimsótt hundruðum enda höfum við verið leiðandi hér á landi hvað varðar vendinám.
    • Starfsfólk Háskólabrúar hefur verið eftirsótt sem fyrirlesarar og til að halda námskeið um vendinám.
    • Hér á Suðurnesjum hefur Keilir verið stuðningsaðili við skóla á svæðinu vegna vendináms
    • Háskólabrú sendir öllum útskrifuðum nemendum eftirfylgnikönnun á annarri önn eftir útskrift. Þar er haldið til haga mikilvægum upplýsingum um hvert nemendur halda í háskólanám, hvað þeir eru að nema og hvernig þeim finnist þeir vera undirbúnir. Þessar kannanir hafa verið mikilvægur þáttur í gæðastarfi Háskólabrúar.
    • Um miðjan apríl 2015 bauð Háskólabrú öllum útskrifuðum nemendum á Háskólabrú til endurfundar (e. reunion) hér í Keili, en þeir eru yfir 1200. 
  • Þjónusta

    • Skrifstofa

      Þegar nemendur þurfa þjónustu af einhverju tagi er skrifstofa Keilis fyrsti staðurinn sem þeir leita til. Þar má m.a. fá ýmis vottorð um skólavist og yfirlit yfir námsferla. Á skrifstofunni er einnig hægt að kaupa prentkvóta og þar eru stúdentakort afhent. Ýmis önnur þjónusta er veitt á skrifstofunni og geti starfsmenn ekki afgreitt málið vísa þeir því rétta leið.  

      • Skrifstofan er opin kl. 8:00 - 12:00 og kl. 13:00 - 16:00 alla virka daga.
      • Sími: 578 4000
      • Fax: 578 4001
      • Netfang: keilir@keilir.net
    • Nemendaskírteini

      Allir nemendur Keilis geta fengið nemendaskírteini sér að kostnaðarlausu á skrifstofu skólans. Ef skírteinin tapast þá kostar endurútgefið kort 2.000 kr. Stefnt er að því að skírteinin séu tilbúin við skólasetningu og ættu nemendur að geta nálgast sín skírteini þá. Notast er við myndir úr Innu, en ef þar er engin mynd er hægt að láta taka af sér mynd á skrifstofunni. 

    • Bókasafn

      Bókasafn Keilis veitir persónulega þjónustu og styður nám og kennslu við skólann. Þjónustan við notendur felst einkum í: 

      • faglegri upplýsingaþjónustu
      • leiðbeiningum við heimildaleit
      • leiðbeiningum við upplýsingalæsi
      • úrvinnslu heimilda
      • útlánum
      • margs konar námsaðstoð

      Samstarf við Bókasafn Reykjanesbæjar

      Á milli Bókasafns Reykjanesbæjar og Keilis er þjónustusamningur þar sem nemendur Keilis fá fullan aðgang að safnkosti og þjónustu bókasafns Reykjanesbæjar. Samningurinn felur m.a. í sér eftirfarandi:

      • Nemendur Keilis fá frí lánþegaskírteini gegn framvísun skólaskírteinis
      • Nemendur Keilis fá upplýsingaþjónustu og aðstoð við heimildaleit
      • Nemendur Keilis fá safnkennslu í upplýsingalæsi

      Upplýsingaþjónusta

      Bókasafns- og upplýsingafræðingur er á vakt í Keili alla kennsludaga frá kl. 10.00 til 16:00. Fyrirspurnir má senda á bokasafn@keilir.net þar sem bókasafns- og upplýsingafræðingur annast alla upplýsingaþjónustu. Bókasafnið veitir aðstoð við upplýsinga- og heimildaleit.

      • Sendu tölvupóst: Við svörum tölvupósti alla virka daga. Netfangið er bokasafn@keilir.net
      • Sendu skilaboð á facebook: Við fylgjumst með facebook alla virka daga.
      • Hringdu: Við erum við frá kl. 10:00 - 16:00 alla skóladaga. Síminn er 578 4007.
      • Komdu á safnið: Bókasafn Keilis er staðsett í miðrými aðalbyggingar Keilis. Opnunartíminn er kl. 10:00 - 16:00 alla skóladaga. Aðstoð er veitt við að nálgast efni, sem ekki er á safninu, á öðrum söfnum (millisafnalán) gegn gjaldi. 
    • Tölvuþjónusta

      Í tölvuþjónustu Keilis er hægt að fá aðstoð við ýmis vandamál tengd tölvum, s.s. lykilorð nemenda, prentun og annað. Starfsmaður í tölvuþjónustu er til staðar fyrir nemendur alla virka daga frá klukkan 8:30 til 15:30. Lokað er á milli 12:00 og 13:00. Agnar Guðmundsson og Gísli Torfason sjá um tölvukerfi Keilis og þjónustu við nemendur.

      Hægt er að óska eftir verkbeiðni frá tölvuþjónustunni rafrænt á heimasíðu Keilis.

      Tölvunet

      Tölvunet Keilis samanstendur af tölvupóstkerfi, prentkerfi, þráðlausu neti og kennslukerfi. Einnig hafa nemendur aðgang að upplýsingakerfinu Innu og gjaldfrjálsan aðgang að fimm eintökum af Microsoft Office. Nemendur þurfa að vera með Office 2013 pakkann eða nýrri útgáfu uppsettan á tölvum sínum. Þeir sem nota Apple tölvur þurfa að vera með Mac office 2011 uppsett á vélunum hjá sér. 

      Að spara prentkvóta – umhverfisvernd

      Hjá Keili er lögð áhersla á umhverfisvernd. Öllum pappír er skilað til endurvinnslu og eru nemendur hvattir til að koma afgangspappír í grænu tunnurnar sem eru hjá prenturum. Stór þáttur í umhverfisvernd felst í því að takmarka notkun á pappír eins og mögulegt er. Það biðjum við nemendur að hafa í huga í hvert skipti sem prentað er út.

    • Náms- og starfsráðgjöf

      Skrifstofa náms- og starfsráðgjafa er staðsett við aðalskrifstofu Keilis. Opnir viðtalstímar eru alla daga kl. 9:00 - 12:00 og 13:00 - 16:00. Náms- og starfsráðgjafar Keilis eru Skúli Freyr Brynjólfsson og Þóra Kristín Snjólfsdóttir.

      Meginhlutverk náms- og starfsráðgjafar er að veita nemendum margvíslegan stuðning í námi og er markmið hennar að stuðla að aukinni vellíðan og árangri nemenda.

      Helstu viðfangsefni ráðgjafarinnar eru:

      • Ráðgjöf um vinnubrögð og námstækni
      • Að veita nemendum persónulega ráðgjöf
      • Ráðgjöf og úrræði vegna fötlunar eða sértækra námsörðugleika
      • Upplýsingagjöf um námsleiðir og störf til núverandi og verðandi nemenda skólans
      • Starfsráðgjöf og ráðgjöf um gerð atvinnuumsókna
      • Að efla sjálfsþekkingu nemenda með viðtölum og verkefnum 

      Fátt mannlegt er náms- og starfsráðgjafanum óviðkomandi. Hann ber virðingu fyrir þér sem persónu og hlustar af athygli. Hann segir þér ekki hvað þú átt að gera en aðstoðar þig við að finna þínar leiðir.

      Námskeið

      Ýmis styttri og lengri námskeið um ofangreind efni eru í boði, auglýst sérstaklega hverju sinni. Nemendur eru hvattir til að gefa sér tíma til að sækja námskeið til að skerpa á námstækninni og auka þannig afköst og árangur.

      Úrræði í námi vegna fötlunar eða sértækra námsörðugleika

      Náms-og starfsráðgjöf skólans hefur yfirumsjón með sérúrræðum og skal nemandi sem óskar eftir slíku gefa sig fram við námsráðgjöf. Vegna allra sérúrræða skal nemandi skila inn greiningu eða vottorði frá þar til bærum aðila. Ef um sérúrræði á námstíma er að ræða þarf að skila vottorði/greiningu strax í fyrstu kennsluviku. Ef um sérúrræði í prófum er að ræða skal skila í síðasta lagi mánuði fyrir fyrsta próf. Sé greiningu/vottorði skilað eftir þennan tíma er ekki öruggt að náist að ganga frá sérúrræðum. Því er áríðandi að nemendur virði þessi tímamörk.