Umsóknarfestur í flugvirkjanám Keilis

Opnað hefur verið fyrir umsóknir í næsta námskeið í flugvirkjanámi AST og Keilis sem hefst í ágúst 2017.

Air Service Training ltd. (AST) í samstarfi við Keili hefur sett upp útibú frá skóla sínum í Perth í Skotlandi hjá Flugakademíu Keilis. Í skólanum fer fram réttindanám flugvirkja í glæsilegri aðstöðu skólans á Ásbrú í Reykjanesbæ. Hluti af verklega náminu (um átta vikur) fer fram hjá AST í Skotlandi, en með því öðlast nemendur alþjóðlega reynslu í einum virtasta flugvirkjaskóla í Evrópu.

Um er að ræða fimm anna samþykkt nám fyrir flugvirkja „Approved IR Part 66 Category B“ sem er bóklegt og verklegt iðnnám flugvirkja. Námið tekur mið af námsskrá sem gefin er út af EASA samkvæmt samevrópskri útgáfu skírteina og sér AST um framkvæmd og ber faglega ábyrgð á gæðum námsins. Þeir sem ljúka flugvirkjanámi hjá AST öðlast öll þau réttindi sem EASA 145 viðhaldsfyrirtæki krefjast við ráðningu flugvirkja fyrir nútíma flugvélar.

Umsóknarfrestur er til 15. maí næstkomandi. Nánari upplýsingar á heimasíðu Flugakademíu Keilis.