Tíunda kennsluvél Flugakademíu Keilis

Stian Skovro tekur við flugvélinni í Diamond verksmiðjunni í Austurríki
Stian Skovro tekur við flugvélinni í Diamond verksmiðjunni í Austurríki

Flugakademía Keilis tók við nýrri DA40 kennsluvél í verksmiðju austurríska flugvélaframleiðandans Diamond í byrjun september. Við komuna til landsins hefur flugskólinn yfir að ráða tíu flugvélar frá Diamond, fimm tveggja sæta DA20, fjórar fjögurra sæta DA40 og eina tveggja hreyfla DA42. 

Nýja vélin hefur fengið auðkennisstafina TF-KFI og er með tæknivæddustu kennsluvélum á landinu, búin fullkomnum blindflugsbúnaði, stórum tölvuskjám og nútíma flugmælitækjum, sjálfstýringu og veðursjá. Stian Skovro, flugkennari hjá Keili, tók við flugvélinni í Diamond verksmiðjunni í Austurríki 5. september, en skólinn tók í notkun sambærilega flugvél fyrr á þessu ári.
 
Tæknivæddustu kennsluvélar á landinu
 
Floti kennsluvéla Flugakademíu Keilis er orðinn einn sá nýstárlegasti og yngsti í Evrópu, og er nýjustu vélinni ætlað að bregðast við aukinni eftirspurn eftir flugnámi við skólann. Þá tók skólinn einnig í notkun fullkominn flughermi á síðasta ári að gerðinni Redbird en um er að ræða hreyfanlegan hátækni flughermi sem býður uppá fjölbreytta notkunarmöguleika í þjálfun flugnemenda skólans.
 
Fullbókað í atvinnuflugmannsnám haustið 2016
 
Nú stunda hátt í tvö hundruð nemendur flugtengt nám við Keili, þar á meðal atvinnuflugmannsnám og flugvirkjanám. Flugakademía Keilis býður bæði upp á einkaflugmannsnám, samtvinnað atvinnuflugmannsnám (sameinað einka- og atvinnuflugmannsnám) og ATPL nám, og eru teknir inn nýir nemendur í námið þrisvar á ári. Fullskipað er í atvinnuflugmannsnám í haust en næst verður tekið við nemendum janúar. Vegna mikillar aðsóknar í flugnám hjá Flugakademíu Keilis er áhugasömum bent á að senda inn námsumsókn sem fyrst.
 
Nánari upplýsingar um Flugakademíu Keilis má nálgast á www.flugakademia.is

Tengt efni