Algengar spurningar um flugnám

Hér að neðan finnur þú samantekt af spurningum um flugnám Keilis, námið, kostnað og aðstöðuna. Smelltu á þá spurningu sem þú vilt fá svar við hér fyrir neðan. Ef þú ert með frekari spurningar, vinsamlegast hafðu samband við okkur á flugakademia@keilir.net.

  • Hvað er samtvinnað atvinnuflugmannsnám - Integrated Professional Pilot Program?

    Hin hefðbundna námsleið flugmannsins er hið svokallaða áfangaskipta nám (modular training). Náminu er því skipt upp í smærri áfanga og getur nemandi hagað námi sínu að sínum þörfum. Þess vegna er námstíminn yfirleitt frá 2-3 árum og fer eftir nemandanum að raða saman áföngum þannig að þeir falli sem best að hans þörfum og aðstæðum hverju sinni. Áfangarnir eru þá helst einkaflugmannsnám, bóklegt atvinnuflugnám (ATPL, Airline Transport Pilot License theory) og verklegt atvinnuflugnám með viðeigandi áritunum (CPL, Commercial Pilot License). Að því loknu sækir nemandi sér áhafnasamstarfsáfanga (MCC, Multi-Crew Cooperation course).

    Flugakademía Keilis býður nú fyrstur skóla á Íslandi upp á svokallað samtvinnað atvinnuflugmannsnám (IPPP, Ingetrated Professional Pilot Program) og felast í náminu töluverðir kostir frammyfir áfangaskiptu námsleiðina en nemendur í þessu námi geta hafið nám án nokkurs grunns í flugi og útskrifast með atvinnuflugmannsréttindi og MCC. Námstími er um 18 mánuðir.

    Á meðan réttindi nemandans eru sambærileg við útskrift má telja marga kosti samtvinnuðu leiðarinnar en námið er heilsteypt og skipulagt frá grunni til enda og koma til vissir viðbótarþættir í námið sem tryggir að stöðugt er haldið við og bætt við þekkingu og færni. Sem dæmi um þessa viðbótarþjálfun eru verkefnaflug undir bæði sjónflugs- og blindflugsreglum þar sem nemendum er gert að áætla flug eftir vissum skilyrðum og eru verkefnin hönnuð til þess að styrkja aga, ákvarðanatöku, þekkingu og aðra mikilvæga þætti.

    Námið heldur vel utanum nemandann út námstímann og eru allir áfangar og flug (bókleg og verkleg þjálfun) skipulögð fram í tímann.

    Áfangaskipta námsleiðin bíður uppá meiri sveigjanleika sem hentar vissum nemendum betur en þá ber nemandinn meiri ábyrgð á sinni námsframvindu.

  • Hvaða heilbrigðiskröfur eru gerðar til flugnema?

    Öllum handhöfum flugliðaskírteina er skylt að vera handhafar sérstaks Part-MED heilbrigðisvottorðs. Að lokinni fullnægjandi heilbrigðisskoðun hjá fluglækni, sem fer fram í samræmi við kröfur Part-MED, gefur fluglæknir út 1. eða 2. flokks heilbrigðisvottorð. Gildistími 1. og 2. flokks heilbrigðisvottorða er mismunandi. Heilbrigðisskoðanir eru annað hvort 2. flokks sem dugir fyrir alla einkaflugmenn eða 1. flokks þar sem kröfurnar eru eilítið hærri og atvinnuflugmenn þurfa að standast.

    Fyrsta flokks Part-MED heilbrigðisvottorð:

    • Á við um atvinnuflugmannsskírteini og flugvélstjórnarskírteini
    • Gildir í 12 mánuði fyrir atvinnuflugmenn í einstjórnarloftförum þar til þeir ná 40 ára aldri
    • Gildir í 12 mánuði fyrir atvinnuflugmenn í fjölstjórnarloftförum þar til þeir ná 60 ára aldri, en eftir það gildir vottorð í 6 mánuði
    • Gildir í 12 mánuði fyrir  flugvélstjóra  

    Annars flokks Part-MED heilbrigðisvottorð:

    • Á við um flugnema, einkaflugmenn, svifflugmenn og fisflugmenn
    • Gildir í 60 mánuði til fertugs, í 24 mánuði til fimmtugs og í 12 mánuði eftir það

    Hægt er að nálgast lista yfir samþykkta fluglækna og fluglæknasetur á Íslandi á heimasíðu Samgöngustofu.

  • Þarf ég einhverja menntun til að geta byrjað að læra flug?

    Nemendur þurfa að geta sýnt frammá færni og kunnáttu í stærðfræði, ensku og eðlisfræði.

    Keilir Flugakademía metur hæfni umsækjanda við umsókn.

  • Hvaða kröfur eru gerðar til nemenda sem sækja um Atvinnuflugmannsnám ATPL?

    Umsækjendur um ATPL námskeið þurfa að vera handhafar einkaflugmannsskírteinis en jafnframt mælum við með því að nemendur hafi staðist 1. flokks læknisskoðun áður en námið hefst. Umsækjendur þurfa að hafa staðgóða þekkingu á stærðfræði, ensku og eðlisfræði þegar námið hefst, í því skyni að geta tileinkað sér námsefnið. Keilir tekur gild stúdentspróf í ofantöldum greinum, en þeir sem ekki hafa stúdentspróf eiga samt sem áður kost á því að þreyta inntökupróf í þessum greinum.

  • Hvað kostar að verða flugmaður?

    Samtvinnað atvinnuflugnám er námsbraut sem inniheldur allt sem nemandi þarf frá A-Ö. Öll kennsla og kennslugögn eru innifalin en verð eru auglýst í verðskrá.

    Nánari upplýsingar

  • Hvað þarf ég að vera gamall til að hefja einkaflugmannsnám?

    Nemendur þurfa að hafa náð 17 ára aldri til að ljúka einkaflugmannsnámi. Því er æskilegt að nemandi sé orðin allavega 16 ára við upphaf náms.

    Við upphaf atvinnuflugmannsnáms, hvort sem um er að ræða samtvinnað eða áfangaskipt nám þarf umsækjandi að vera að lágmarki 18 ára við upphaf náms.

  • Hvað kostar að verða atvinnuflugmaður - með öllu?

    Hagstæðasta og fljótlegasta námsleiðin er Samtvinnað Atvinnuflugnám og er innifalið í verðinu allt sem snýr að náminu og skólanum. Til viðbótar við námsgjöldin má gera ráð fyrir kostnaði vegna próftöku hjá Samgöngustofu, heilbrigðisvottorðs, heyrnatóla osfrv. Kostnaður vegna þessa er um 300.000 kr.

    Sjá hér frekari upplýsingar um Samtvinnað Atvinnuflugnám og verð

  • Hvað tekur langan tíma að verða einkaflugmaður?

    Námið tekur að jafnaði um 6 mánuði en lengd náms er breytileg eftir högum nemandans. Nemandi þarf að ljúka bóklegu námi sem tekur um 3 mánuði og er námsskeiðið kennt þrisvar á ári.

  • Hvað tekur langan tíma að verða atvinnuflugmaður?

    Allt frá byrjun til enda tekur samtvinnað atvinnuflugmannsnám um 18 mánuði. Einkaflugmannsnám og áfangaskipt atvinnuflugmannsnám tekur að jafnaði 24-30 mánuði með tímasöfnun.

  • Hvaða próf þarf maður að taka fyrir einkaflugmannsréttindi?

    Nemendur sem útskrifast af einkaflugmannsnámskeiði fá réttindi til að þreyta próf hjá Flugmálastjórn Íslands. Nánari upplýsingar um bóklega námið er að finna hérna.

  • Hvaða próf þarf maður að taka fyrir atvinnuflugmannsréttindi?

    Nemendur sem útskrifast úr atvinnuflugmannsnámi hjá Keili fá rétt til að þreyta próf hjá Flugmálastjórn Íslands. Nánari upplýsingar um bóklega námið er að finna hérna.

  • Er hægt að leigja hjá ykkur flugvélar?

    Já það er hægt.

    Flugvélarnar okkar eru allar nýjar og DA-40 og DA-42 vélarnar eru mjög tæknivæddar. Þeir flugmenn sem hafa áhuga á að fljúga nýjustu kennsluflugvélum á Íslandi er bent á að hafa samband við flugakademia@keilir.net til að panta sér kynningu á hinum nýju flugvélum. DA-40 og DA-42NG vélarnar eru útbúnar Garmin G1000 flugmælitækjum og þurfa flugmenn að sækja sérstakt námskeið hjá Keili. Þeir flugmenn sem kaupa 5 tíma eða fleiri á DA-40 fá námskeiðið með í kaupunum.

  • Hvar eruð þið staðsett?

    Við erum með skrifstofur í aðalbyggingu Keilis að Grænásbraut 910 á Ásbrú (við Keflavíkurflugvöll). Verklega kennslan fer fram frá byggingu 827 og skýli 780, þar eru flugvélarnar okkar jafnframt geymdar og þeim haldið við.