Flugvirkjanám Keilis flyst til Tækniskólans

Viðræður milli Keilis og Tækniskólans hafa leitt til samkomulags um að síðarnefndi skólinn taki yfir kennslu í flugvirkjanámi Keilis frá og með haustönn 2019.

Flugakademía Keilis hóf fyrst kennslu í flugvirkjanámi haustið 2013 en síðan þá hafa samtals 68 nemendur lokið náminu við skólann. Frá upphafi hefur námið verið unnið í samvinnu við AST (Air Service Training) í Skotlandi sem ber faglega ábyrgð á gæðum þess.

Meginástæða fyrir samruna flugvirkjanáms Keilis og Tækniskólans er sú að aðsókn í námið hefur dregist saman í báðum skólum og telja forsvarsmenn beggja skóla að langtímahagsmunir greinarinnar og nemenda séu best tryggðir með þessum hætti. Gert er ráð fyrir því að núverandi nemendur Keilis ljúki námi sínu hjá Tækniskólanum og stefnt að því að þessar breytingar hafi sem minnst áhrif á námsframvindu þeirra. Kjósi þeir að ljúka námi sínu hjá núverandi samstarfsaðila Keilis, AST í Skotlandi, stendur þeim það einnig til boða.

Forsvarsmenn Keilis og Tækniskólans telja breytinguna þjóna hagsmunum nemenda og munu leggja sig fram um að veita þeim sem best skilyrði til að ljúka námi sínu.