Flugakademía Keilis og AST útskrifa flugvirkja í fjórða sinn

Útskrift flugvirkjanema Keilis og AST í janúar 2018
Útskrift flugvirkjanema Keilis og AST í janúar 2018

Flugakademía Keilis útskrifaði í fjórða sinn flugvirkja frá Keili við hátíðlega athöfn á Ásbrú föstudaginn 12. janúar síðastliðinn. Rúnar Árnason, forstöðumaður Flugakademíu Keilis flutti ávarp og afhenti atvinnuflugmönnum prófskírteini ásamt Rannveigu Erlu Guðlaugsdóttur, verkefnastjóra flugvirkjanámsins.

22 nemendur útskrifuðust úr náminu að þessu sinni og fékk Bergur Sverrisson viðurkenningu fyrir góðan námsárangur. Fékk hann bókagjöf frá Isavia. Með útskriftinni hafa 68 nemendur lokið flugvirkjanámi við skólann. Davíð Ingi Jóhannsson, nemandi í flugvirkjanámi, flutti ræðu útskriftarnema fyrir hönd Flugakademíu Keilis. Hann hlaut einnig viðurkenningu frá deildinni fyrir góðan árangur og eljusemi og fékk hann bókagjöf frá Isavia.

Flugakademía Keilis býður upp á námið í samvinnu við AST (Air Service Training) í Skotlandi. Um er að ræða fimm anna samþykkt nám fyrir flugvirkja „Approved IR Part 66 Category B“ sem er bóklegt og verklegt iðnnám flugvirkja. Námið tekur mið af námsskrá sem gefin er út af EASA samkvæmt samevrópskri útgáfu skírteina og sér AST um framkvæmd og ber faglega ábyrgð á gæðum námsins. Þeir sem ljúka flugvirkjanámi hjá AST öðlast öll þau réttindi sem EASA 145 viðhaldsfyrirtæki krefjast við ráðningu flugvirkja fyrir nútíma flugvélar.

Myndir frá athöfninni á facebooksíðu Flugakademíunnar