Flugakademía Keilis bætir við námskeiðum í atvinnuflugmannsnámi

Frá útskrift atvinnuflugnema Flugakademíu Keilis sumarið 2016
Frá útskrift atvinnuflugnema Flugakademíu Keilis sumarið 2016
Vegna mikillar eftirspurnar hefur Flugakademía Keilis bætt við innritunardegi fyrir samtvinnað atvinnuflugmannsnám (Integrated Professional Pilot Program) í sumar en fullskipað hefur verið í undanfarna bekki. Næstu námskeið munu því hefjast 5. maí og 26. maí næstkomandi. Þá verður einnig hægt að hefja samtvinnað atvinnuflugmannsnám 25. ágúst á þessu ári, auk þess sem hægt verður að hefja bóklegt áfangaskipt atvinnuflugmannsnám (ATPL Theory) bæði 5. maí og 25. ágúst.. Umsóknir verða að berast að minnsta kosti fjórum vikum áður en námið hefst.
 
Hver er munurinn á samtvinnuðu og áfangaskiptu atvinnuflugmannsnámi?
 
Flugakademía Keilis býður nú fyrstur skóla á Íslandi upp á svokallað samtvinnað atvinnuflugmannsnám. Nemendur á þessari námsleið geta hafið nám án nokkurs grunns í flugi eða sem handhafar einkaflugmannsskírteinis. Samtvinnað atvinnuflugmannsnám er krefjandi og skemmtilegt og tekur um 18 mánuði í fullu námi sem er skipulagt frá upphafi til enda. Námsleiðinni fylgir góð heildaryfirsýn og utanumhald um framvindu námsins sem skilar sér í markvissara námi. Þar með er samtvinnaða atvinnuflugmannsnámið mjög skilvirk og hagkvæm námsleið sem kemur umsækjandanum fyrr og betur út á atvinnumarkaðinn.
 
Flugakademía Keilis býður einnig upp á nám áfangaskipt (modular) atvinnuflugmannsnám. Helsti kosturinn við áfangaskipta námsbraut er að það er meiri sveigjanleiki í námstíma og hentar því umsækjendum með fjölskyldur eða aðrar skuldbindingar sem þarf að sinna sem getur haft áhrif á nemandann. Nemandi getur tekið fullt áfangaskipt atvinnuflugnám (allir áfangar) eða valið staka áfanga eftir þörfum og fyrri reynslu. Það tekur um 18-24 mánuði til að ljúka öllum áföngum ásamt tímasöfnun og öðlast öll tilskilinn réttindi til að sækja um hjá flugfélögum og flugrekendum sem atvinnuflugmaður.
 
Flugvirkjanám hefst í ágúst
 
Líkt og undanfarin ár er mikil ásókn í flugvirkjanám, en Fugakademía Keilis býður upp á réttindanám flugvirkja í nýrri aðstöðu skólans á Ásbrú í Reykjanesbæ. Um er að ræða fimm anna bóklegt og verklegt iðnnám flugvirkja fyrir þá sem vilja öðlast alþjóðleg starfsréttindi og starfa í fjölbreyttu starfsumhverfi að viðhaldi flugvéla af öllum stærðum og gerðum.
 
Fjórar vikur námsins fara fram í samstarfsskóla Keilis í Skotlandi og fá nemendur þar með einstakt tækifæri til að sækja alþjóðlega reynslu og efla tengslanet sitt, ásamt því að læra verklags- og vinnureglur í einum virtasta flugvirkjaskóla Evrópu. Miklir alþjóðlegir atvinnumöguleikar eru fyrir flugvirkja og góð tækifæri til frekari menntunar og starfsþróunar. Nemendum stendur til boða fjölbreyttur starfsvettvangur með mikla möguleika á sérhæfingu í framhaldi af náminu. Umsóknarfrestur er til 15. maí næstkomandi.